აშშ-ის პრეზიდენტმა დონალდ ტრამპმა მრჩევლებს დაავალა, ჩრდილოეთ კორეის ლიდერ კიმ ჩენ ინთან ამ შემოდგომაზე, რაც შეიძლება მოკლე დროში, შეხვედრა გაიმართოს. Wall Street Journal-ის ცნობით, რომელიც ამერიკელ ოფიციალურ პირებს ეყრდნობა, ტრამპს სურს გააცოცხლოს გამორჩეული დიპლომატიური ინიციატივა, რომელიც პირველი საპრეზიდენტო ვადის დროს დაიწყო და რომლის მიზანიც ფხენიანის დარწმუნება იყო ბირთვული იარაღის პროგრამის ლიკვიდაციაში.
ოფიციალური პირების თქმით, ტრამპმა პირად საუბრებში წამოჭრა საკითხი აზიაში მომდევნო ვიზიტის დროს კიმ ჩენ ინთან პირისპირ შეხვედრის ორგანიზების შესაძლებლობის შესახებ.
როგორც აღინიშნება, შეხვედრა შეიძლება ნოემბერში შედგეს, როდესაც მსოფლიო ლიდერები ჩინეთის ქალაქ შენჯენში აზია-წყნარი ოკეანის ეკონომიკური თანამშრომლობის (APEC) სამიტზე შეიკრიბებიან.
მიუხედავად იმისა, რომ ოფიციალური დაგეგმვის პროცესი ჯერ არ დაწყებულა, ტრამპის ინტერესი მიუთითებს მცდელობაზე, განაახლოს პირდაპირი დიპლომატია ფხენიანთან მას შემდეგ, რაც კიმთან მისი ბოლო შეხვედრიდან ექვს წელზე მეტი გავიდა.
ტრამპი გასულ წელსაც ცდილობდა აზიური ტურნეს დროს კიმთან შეხვედრას, თუმცა ლოგისტიკური პრობლემების გამო სამიტი არ შედგა.
ბირთვული არსენალი იზრდება
ორ ლიდერს შორის დიპლომატიური პროცესი მას შემდეგ შეფერხდა, რაც 2018 წელს სინგაპურში და 2019 წელს ჰანოიში გამართულმა სამიტებმა ბირთვული განიარაღების გადამოწმებადი შეთანხმების მიღწევა ვერ შეძლო.
მოგვიანებით, იმავე წელს, ლიდერები მესამედ შეხვდნენ ერთმანეთს ჩრდილოეთ და სამხრეთ კორეის გამყოფ დემილიტარიზებულ ზონაში, თუმცა ვერც ამ შეხვედრამ უზრუნველყო ყოვლისმომცველი მოლაპარაკებების განახლება.
მას შემდეგ ჩრდილოეთ კორეამ მკაცრი გასაიდუმლოების პირობებში მნიშვნელოვნად განავითარა და გააფართოვა თავისი სტრატეგიული სამხედრო შესაძლებლობები.
შეიარაღების კონტროლის დამოუკიდებელი ექსპერტების შეფასებით, ჩრდილოეთ კორეის ბირთვულმა არსენალმა ადრე ნავარაუდებ 60 საბრძოლო ქობინას საგრძნობლად გადააჭარბა.
აშშ-ის სადაზვერვო სააგენტოების საფრთხეების ყოველწლიურ შეფასებაშიც აღნიშნულია, რომ ფხენიანს უარი არ უთქვამს სტრატეგიული თავდასხმის შესაძლებლობების გაფართოების მიზანზე.
ვაშინგტონი ჩრდილოეთ კორეას ოფიციალურად არ აღიარებს ბირთვული იარაღის მქონე სახელმწიფოდ. ფხენიანს კი სურს, აშშ-მა ქვეყნის ბირთვული სტატუსი მიიღოს. ამ აზრთა სხვადასხვაობამ შესაძლოა გაართულოს მოლაპარაკებები, რომლებიც შესაძლოა თავიდან დაიწყოს.
