პრეზიდენტმა რეჯეფ თაიფ ერდოღანმა განაცხადა, რომ ისრაელის პრემიერ-მინისტრმა ბენიამინ ნეთანიაჰუმ „გენოციდის დანაშაულში ჰიტლერს დიდი ხანია გადაასწრო“.
პრეზიდენტმა რეჯეფ თაიფ ერდოღანმა, ახლო აღმოსავლეთში მიმდინარე კონფლიქტებთან დაკავშირებით გაკეთებულ განცხადებაში, ხაზი გაუსვა, რომ ისრაელის წინააღმდეგ ირანის თავდაცვის უფლებას მხარს უჭერს.
„ისრაელის ამ ავაზაკობისა და სახელმწიფო ტერორის ფონზე, ირანის თავდაცვა სრულიად ბუნებრივი, ლეგიტიმური და კანონიერი უფლებაა,“ - განაცხადა ერდოღანმა ოთხშაბათს, ანკარაში, სამართლიანობისა და განვითარების პარტიის (AKP) საპარლამენტო ფრაქციის სხდომაზე.
პრეზიდენტმა ერდოღანმა ეს განცხადებები იმ ფონზე გაკეთდა, როდესაც ისრაელის თავდასხმები ირანსა და რეგიონში მის მოკავშირეებზე გახშირდა.
ერდოღანმა ყურადღება გაამახვილა კონფლიქტის სერიოზულობაზე და ისრაელის ხელმძღვანელობა გააკრიტიკა: „ნეთანიაჰუმ გენოციდის დანაშაულში სასტიკ ჰიტლერს დიდი ხანია გადაასწრო. იმედი გვაქვს, მათი ბედი ერთი და იგივე არ იქნება.“
ერდოღანმა ასევე დასძინა: „ჩვენ ყველაფერს ვაკეთებთ, რაც ჩვენს ძალებშია, რათა შევაჩეროთ ეს არაადამიანური აგრესია როგორც ღაზის, სირიის, ლიბანისა და იემენის, ასევე ჩვენი მეზობელი ირანის მიმართ.“
„ტერორისტული თავდასხმები“
ერდოღანმა ისრაელის ქმედებების ჰუმანიტარულ განზომილებაზეც გაამახვილა ყურადღება: „ისრაელის ამ თავხედობის როგორც მხარდამჭერებს, ასევე მათ, ვინც დუმს, ხელებსა და შუბლზე მოკლული მშვიდობიანი მოსახლეობის, ჩვილი ბავშვებისა და ბავშვების სისხლი აქვთ მოსხმული და ეს სისხლის ლაქა იმ ხელებიდან და შუბლებიდან არასდროს ჩამოირეცხება.“
რეგიონული სტაბილურობის საკითხზე საუბრისას პრეზიდენტმა აღნიშნა, რომ თურქეთი მზადყოფნაშია: „ჩვენ ასევე ძალიან ყურადღებით ვაკვირდებით ისრაელის ტერორისტულ თავდასხმებს ირანის წინააღმდეგ. ჩვენი ყველა უწყება და შესაბამისი თანამშრომელი მზადყოფნაშია ამ თავდასხმების თურქეთზე შესაძლო გავლენის კუთხით.“
„ჩვენი ერი მშვიდად იყოს. მთავრობა ბოლომდე დაიცავს თურქეთის ინტერესებს, სიმშვიდეს, ერთიანობასა და უსაფრთხოებას,“ - დასძინა მან.
ერდოღანმა ასევე თქვა: „ჩვენ მზადება გავიარეთ და ახლაც გავდივართ ყველანაირი ნეგატიური მოვლენისა და სცენარისთვის.“
ერდოღანმა დაგმო გლობალური დუმილი ახლო აღმოსავლეთში მიმდინარე ძალადობის ფონზე: „მთელი მსოფლიოს, მთელი კაცობრიობის თვალწინ განხორციელებული ამ აგრესიის ფონზე, სამწუხაროდ, საერთაშორისო ინსტიტუტები და სახელმწიფოები, უპირველეს ყოვლისა გაერო, დუმილს ინარჩუნებენ, ზოგიერთი კი, სამწუხაროდ, ამ ავაზაკობას ღიად უჭერს მხარს.“
ერდოღანმა ხაზი გაუსვა სიტუაციის სიმწვავეს, მიუთითა კონფლიქტის უფრო ფართო რეგიონულ გავლენებზე და მეტი ანგარიშვალდებულებისკენ მოუწოდა.
„დიახ, ისრაელის აგრესიის შეჩერება აუცილებელია მთელი მსოფლიოსთვის, კაცობრიობისთვის. თუმცა, ამ მოვლენებიდან ჩვენი მეზობელი ირანის ჩათვლით, რეგიონის ყველა ქვეყანამ შესაბამისი გაკვეთილი უნდა გამოიტანოს.“
პრეზიდენტმა ასევე კიდევ ერთხელ დაადასტურა თურქეთის ერთგულება მშვიდობისა და დიპლომატიის მიმართ და ხაზგასმით აღნიშნა, რომ ამ მიმართულებით ძალისხმევა გაგრძელდება.
„ჩვენი ბრძოლა ისრაელის აგრესიის შესაჩერებლად გაგრძელდება. ჩვენი ინიციატივები რეგიონში მშვიდობის დასამყარებლად გაძლიერდება. ჩვენ არ შევწყვეტთ ჩვენს დიპლომატიურ კონტაქტებს, ჩვენს სატელეფონო დიპლომატიას. ჩვენ ყველანაირ ძალისხმევას გამოვიჩენთ, რათა შევაჩეროთ და თავიდან ავიცილოთ დიდი კატასტროფა, რომელიც ყველას შეიძლება შეეხოს,“ - განაცხადა მან.
