აშშ-ის პრეზიდენტმა დონალდ ტრამპმა განაცხადა, რომ მინეაპოლისში საემიგრაციო და საბაჟო სამსახურის (ICE) აგენტის მიერ ქალის მკვლელობა აუცილებელ მოგერიებას ჰგავდა, თუმცა ადგილობრივმა და შტატის ოფიციალურმა პირებმა ეს განცხადება უარყვეს და გამოძიების ჩატარება მოითხოვეს.

ტრამპმა Truth Social-ზე გამოქვეყნებულ პოსტში აღნიშნა, რომ ავტომობილის მძღოლმა ქალმა „ICE-ის თანამშრომელს ძალადობრივად, განზრახ და სასტიკად გადაუარა“ და აგენტმა, როგორც ჩანს, „თავის დასაცავად ისროლა“.

ფედეარალური ხელისუფლების წარმომადგენლების თქმით, შემთხვევა ოთხშაბათს, საზედამხედველო ოპერაციის დროს მოხდა.

შიდა უსაფრთხოების დეპარტამენტმა განაცხადა, რომ 37 წლის ქალი ავტომობილის ოფიცრებისთვის დაჯახებას შეეცადა, რის შემდეგაც აგენტმა ცეცხლი გახსნა.

შიდა უსაფრთხოების მინისტრმა კრისტი ნოემმა აღნიშნა, რომ ICE-ის აგენტმა „სწრაფად და თავდაცვის მიზნით იმოქმედა“, რის შედეგადაც ქალი დაიჭრა და მოგვიანებით გარდაიცვალა.

თუმცა, მინეაპოლისის მერმა ჯეიკობ ფრეიმ ეს ვერსია უარყო. მან განაცხადა, რომ პირადად შეისწავლა შემთხვევის ვიდეოჩანაწერები და მიიჩნევს, რომ ცეცხლის გახსნა გამართლებული არ იყო.

ფრეიმ ძალის გამოყენებას „თავზეხელაღებული“ უწოდა და მოითხოვა, რომ ფედერალურმა საემიგრაციო აგენტებმა ქალაქი დატოვონ.

„ჩვენ მოვითხოვთ, რომ ICE-მა დაუყოვნებლივ დატოვოს ქალაქი. ჩვენ ვდგავართ ჩვენი იმიგრანტებისა და ლტოლვილების გვერდით,“ — განაცხადა ფრეიმ.

მინესოტას გუბერნატორმა ტიმ ვოლზმაც გაიზიარა მერის შეშფოთება და მოსახლეობა შიდა უსაფრთხოების დეპარტამენტის „პროპაგანდისტული მანქანის“ შესახებ გააფრთხილა.

ვოლზმა აღნიშნა, რომ შტატი „სრულყოფილ, სამართლიან და სწრაფ გამოძიებას“ ჩაატარებს.

გუბერნატორმა ასევე დასძინა, რომ გასცა ბრძანება მინესოტას ეროვნული გვარდიის მზადყოფნაში მოყვანის შესახებ, რათა საჭიროების შემთხვევაში ისინი შტატის ტერიტორიაზე განლაგდნენ.