ჩინეთმა თავის მოქალაქეებს იაპონიაში მოგზაურობისგან თავის შეკავება ურჩია. ამან კიდევ უფრო გაამწვავა დიპლომატიური დაძაბულობა, რომელიც იაპონიის ახალი პრემიერ-მინისტრის განცხადებებმა გამოიწვია ტაივანზე შესაძლო თავდასხმასთან დაკავშირებით.
კრიზისი პრემიერ-მინისტრ სანაე ტაკაიჩის 7 ნოემბრის განცხადებების შემდეგ დაიწყო. განცხადებები იმგვარად იქნა ინტერპრეტირებული, რომ ტაივანზე თავდასხმამ, თვითმმართველ კუნძულზე, რომელზეც ჩინეთი აცხადებს სუვერენიტეტს და რომელიც იაპონიის უახლოესი კუნძულიდან დაახლოებით 100 კილომეტრში მდებარეობს, შესაძლოა ტოკიოს სამხედრო ჩარევა გამოიწვიოს.
პეკინმა პარასკევს განაცხადა, რომ იაპონიის ელჩი ოფიციალური საყვედურის გამოსაცხადებლად დაიბარა.
ტოკიომ საპასუხოდ ჩინეთის ელჩი დაიბარა „შეუფერებლად“ შეფასებული და მოგვიანებით წაშლილი ონლაინ პოსტის გამო.
იაპონია დაჟინებით აცხადებს, რომ მისი პოზიცია ტაივანის საკითხთან დაკავშირებით უცვლელია.
პარასკევს გვიან საღამოს ჩინეთის საელჩომ ტოკიოში გამოაქვეყნა ონლაინ გაფრთხილება, რომელიც ჩინეთის მოქალაქეებს მოუწოდებდა, გადაეხედათ თავიანთი მოგზაურობის გეგმებისთვის.
საელჩომ თავის ოფიციალურ WeChat ანგარიშზე განაცხადა: „ბოლო დროს იაპონელმა ლიდერებმა ტაივანის საკითხთან დაკავშირებით აშკარად პროვოკაციული განცხადებები გააკეთეს და ამან სერიოზულად დააზიანა ხალხთაშორისი ურთიერთობების ატმოსფერო.“
პოსტში ასევე გაფრთხილება იყო, რომ სიტუაცია „მნიშვნელოვან რისკებს უქმნის იაპონიაში მყოფი ჩინეთის მოქალაქეების პირად უსაფრთხოებასა და სიცოცხლეს“.
„საგარეო საქმეთა სამინისტრო და ჩინეთის საელჩო და საკონსულოები იაპონიაში სერიოზულად აფრთხილებენ ჩინეთის მოქალაქეებს, თავი შეიკავონ იაპონიაში მოგზაურობისგან უახლოეს მომავალში“, – ნათქვამია განცხადებაში.
პეკინი აცხადებს, რომ ტაივანი, რომელიც 1945 წლამდე იაპონიის ოკუპაციის ქვეშ იყო, მისი ტერიტორიის ნაწილია და არ გამორიცხავს კუნძულის ხელში ჩაგდების მიზნით ძალის გამოყენების ვარიანტს.
