პრეზიდენტმა დონალდ ტრამპმა განაცხადა აშშ-ს გარეთ გადაღებულ ყველა ფილმზე ახალი საბაჟო ტარიფების დაწესების შესახებ და ამტკიცებს, რომ ჰოლივუდი „ნადგურდება“ ამერიკელი კინორეჟისორების და სტუდიების საზღვარგარეთ მუშაობის გამო.
ეს განცხადება გაკეთდა იმ პერიოდში, როდესაც თეთრი სახლი მზარდი კრიტიკის წინაშე დგას თავისი აგრესიული სავაჭრო პოლიტიკის გამო, რომელიც მსოფლიოს მრავალ ქვეყანაზე ფართომასშტაბიანი ტარიფების დაწესებას გულისხმობს.
ტრამპმა კვირას პლატფორმა Truth Social-ზე დაწერა: „ვაჭრობის სამინისტროსა და აშშ-ს სავაჭრო წარმომადგენელს უფლებას ვანიჭებ, დაუყოვნებლივ დაიწყონ უცხო ქვეყნებში წარმოებულ და ჩვენს ქვეყანაში შემოსულ ყველა ფილმზე 100%-იანი საბაჟო ტარიფის დაწესების პროცესი.“
ტრამპის ეს პოსტი მას შემდეგ გამოქვეყნდა, რაც ჩინეთმა, რომელიც ყველაზე მეტად დაზარალდა აშშ-ს პრეზიდენტის მკაცრი სავაჭრო პოლიტიკისგან, გასულ თვეს განაცხადა, რომ შეამცირებს აშშ-დან იმპორტირებული ფილმების რაოდენობას. ჩინეთი მნიშვნელოვნად დაზარალდა ამ აგრესიული პოლიტიკისგან, რომელიც მრავალ პროდუქტზე 145%-იან ტარიფებს აწესებს.
‘ძალიან სწრაფი სიკვდილი’
„ამერიკის კინოინდუსტრია ძალიან სწრაფი სიკვდილისკენ მიექანება. სხვა ქვეყნები ყველანაირ სტიმულს სთავაზობენ ჩვენი კინორეჟისორებისა და სტუდიების აშშ-სგან ჩამოსაშორებლად,“ - დაწერა ტრამპმა კვირას.
„ჰოლივუდი და აშშ-ს ბევრი სხვა სფერო ნადგურდება,“ - დაამატა მან და განაცხადა, რომ ეს ეროვნული უსაფრთხოებისთვის მუქარას წარმოადგენს.
ჯერჯერობით უცნობია, რა გავლენას მოახდენს ეს კინოინდუსტრიაზე, ან ზუსტად როგორ განხორციელდება აღნიშნული საბაჟო ტარიფების დაწესება.
ტრამპის პოსტში არაფერია ნათქვამი სატელევიზიო სერიალებზე, რომლებიც ეკრანისთვის სულ უფრო პოპულარული და მომგებიანი წარმოების სექტორია.
ჩინეთი
ტრამპმა ასევე განაცხადა, რომ აშშ მრავალ ქვეყანასთან, მათ შორის ჩინეთთან, აწარმოებს მოლაპარაკებებს სავაჭრო შეთანხმებებზე და რომ ჩინეთთან მისი პრიორიტეტი სამართლიანი სავაჭრო გარიგების მიღწევაა.
ტრამპმა Air Force One-ის ბორტზე ჟურნალისტებს განუცხადა, რომ ამ კვირაში ჩინეთის პრეზიდენტ სი ძინპინთან საუბარს არ გეგმავს, თუმცა ამერიკელი ოფიციალური პირები ჩინელ კოლეგებთან სხვადასხვა საკითხზე საუბრობენ.
კითხვაზე, გამოცხადდება თუ არა რაიმე სავაჭრო შეთანხმება ამ კვირაში, ტრამპმა უპასუხა, რომ ეს „ძალიან სავარაუდოა“, თუმცა დეტალები არ დაუკონკრეტებია.
