თურქეთის პრეზიდენტი რეჯეფ თაიფ ერდოღანი ვაშინგტონში, აშშ-ის პრეზიდენტ დონალდ ტრამპთან შესახვედრად ჩავიდა.
ტრამპი ერდოღანს ხუთშაბათს თეთრ სახლში უმასპინძლებს, სადაც ისინი ორმხრივ ურთიერთობებსა და რეგიონულ საკითხებზე იმსჯელებენ.
მოსალოდნელია, რომ განხილვის თემები იქნება ვაჭრობა, ინვესტიციები და თავდაცვის ინდუსტრია.
„მჯერა, რომ ჩვენი შეხვედრა პრეზიდენტ ტრამპთან ხელს შეუწყობს ომებისა და კონფლიქტების დასრულებას ჩვენს რეგიონში, ჩვენი საერთო ხედვის ფარგლებში გლობალური მშვიდობისთვის და კიდევ უფრო გააძლიერებს ჩვენს ქვეყნებს შორის თანამშრომლობას,“ - განაცხადა ერდოღანმა.
თურქეთის პრეზიდენტი, რომელიც ნიუ-იორკში გაეროს გენერალური ასამბლეის წლევანდელ სესიაზე დასასწრებად იმყოფებოდა, სამშაბათს ტრამპისა და პირველი ლედის, მელანია ტრამპის მიერ სახელმწიფო მეთაურებისა და მათი მეუღლეებისთვის გამართულ მიღებას დაესწრო.
გარდა ამისა, სამშაბათს ერდოღანი ტრამპთან ერთად გაეროს გენერალური ასამბლეის პარალელურად გამართულ მრავალმხრივ შეხვედრაში მონაწილეობდა, რომელიც ღაზის საკითხს ეხებოდა.
დახურულ კარს მიღმა გამართული შეხვედრის შესახებ დამატებითი ინფორმაცია არ გავრცელებულა, თუმცა ერდოღანმა განაცხადა, რომ მოლაპარაკებები „ძალიან ნაყოფიერი და პოზიტიური“ იყო და კმაყოფილება გამოხატა.
„ჩვენ ახლახანს დავასრულეთ ძალიან, ძალიან ნაყოფიერი და პოზიტიური შეხვედრა. კმაყოფილი ვარ — შედეგი სასიკეთო იყოს,“ - განაცხადა ერდოღანმა ჟურნალისტებთან ნიუ-იორკში მდებარე “თურქულ სახლში”, მრავალსართულიან თურქულ დიპლომატიურ ცენტრში.
ვაშინგტონში ყოფნისას ერდოღანი ბლერის სახლში, აშშ-ის პრეზიდენტის ოფიციალურ სტუმართა რეზიდენციაში დარჩება.
