ირანის „ისლამური რევოლუციის გუშაგთა კორპუსმა“, აშშ-ის პრეზიდენტ დონალდ ტრამპის სიტყვების საპასუხოდ, რომ კონფლიქტი შესაძლოა მალე დასრულდეს, განაცხადა, რომ ახლო აღმოსავლეთში „ომის დასასრულს თავად განსაზღვრავენ“.
სამშაბათს გავრცელებულ განცხადებაში „გუშაგებმა“ აღნიშნეს: „ომის დასასრულს ჩვენ განვსაზღვრავთ“; იქვე ნათქვამია: „რეგიონის ბალანსი და მისი მომავალი სტატუსი ამიერიდან ჩვენი შეიარაღებული ძალების ხელშია; ამერიკული ძალები ომს ვერ დაასრულებენ“.
ეს სიტყვები ტრამპის იმ კომენტარებს მოჰყვა, რომელთა თანახმადაც ახლო აღმოსავლეთში ომი შესაძლოა მალე დასრულდეს.
ირანის სახელმწიფო მედიის მიერ გავრცელებულ სხვა განცხადებაში „რევოლუციის გუშაგთა კორპუსმა“ გააფრთხილა მხარეები, რომ თუ აშშ-ისა და ისრაელის თავდასხმები გაგრძელდება, თეირანი რეგიონიდან ნავთობის ექსპორტს აღარ დაუშვებს.
IRGC-ის პრესსპიკერმა აღნიშნა, რომ ქვეყანაზე თავდასხმების გაგრძელების შემთხვევაში, „ერთი ლიტრი ნავთობის“ ექსპორტიც კი არ განხორციელდება.
რიტორიკა, რომელიც ძაბავს ვითარებას
თავის მხრივ, ტრამპმა ირანი გააფრთხილა, რომ თუ თეირანი ჰორმუზის სრუტეში ნავთობის გადაზიდვების შეჩერებას შეეცდება, აშშ გაცილებით მკაცრ პასუხს გასცემს. მან დასძინა, რომ სრუტეში ნავთობის ნაკადის დაბლოკვის ნებისმიერი მცდელობის შემთხვევაში, ირანი „სიკვდილს, ცეცხლსა და რისხვას“ იწვნევს.
ტრამპმა ასევე დაიმუქრა, რომ თუ ირანი სრუტის მეშვეობით ნავთობის ტრანსპორტირებას შეაფერხებს, თავდასხმები „ოცჯერ უფრო ძლიერი“ იქნება.
მეორე მხრივ, „რევოლუციის გუშაგთა კორპუსმა“ განაცხადა, რომ მათ რეგიონში აშშ-ის 10 მოწინავე რადარული სისტემა და არაერთი ძვირადღირებული უპილოტო საფრენი აპარატი გაანადგურეს.
IRGC-მ ტრამპი ირანის სამხედრო ძლიერების შესუსტების შესახებ „მცდარი ბრალდებების“ გაჟღერებაში დაადანაშაულა და ხაზგასმით აღნიშნა, რომ იგი ცდილობს საზოგადოებრივი აზრი შეცდომაში შეიყვანოს და ომისგან გამოწვეული ზეწოლა შეამციროს.
„გუშაგებმა“ ასევე უარყვეს მტკიცებულებები იმის შესახებ, რომ ირანმა რაკეტების გაშვება შეამცირა და განაცხადეს, რომ ქვეყანა უშვებს უფრო მძლავრ რაკეტებს, რომელთა საბრძოლო ქობინი ერთ ტონაზე მეტს იწონის.
