ბოლო წლებში ჩინეთის კოსმოსურ პროგრამაში მილიარდობით დოლარი ჩაიდო.
ჩინეთი 24.04.2025 კოსმოსურ სადგურზე ასტრონავტების ახალ ეკიპაჟს გაგზავნის. ეს ქვეყნის მიერ აშშ-ის კოსმოსში დომინირებისთვის კონკურენციის გაწევის მიზნით გადადგმულ მნიშვნელოვან ნაბიჯად განიხილება.
ბოლო წლებში პეკინმა, ჩინეთის პრეზიდენტის, სი ძინპინის მიერ ჩინელი ხალხის „კოსმოსურ ოცნებად“ განსაზღვრული მიზნის მისაღწევად, კოსმოსურ პროგრამაში მილიარდობით დოლარის ინვესტიცია განახორციელა.
მსოფლიოს სიდიდით მეორე ეკონომიკა 2030 წლისთვის მთვარეზე პილოტირებული მისიის გაგზავნას და საბოლოოდ მთვარის ზედაპირზე ბაზის დაარსებას გეგმავს. უახლეს მნიშვნელოვან ეტაპს კი ხუთშაბათს, მისიით „შენჯოუ-20“ (Shenzhou-20), სამი ასტრონავტისგან შემდგარი ეკიპაჟის ქვეყნის მიერ აშენებულ ტიანგუნის (Tiangong) კოსმოსურ სადგურზე მიღწევით აღნიშნავს.
ჩინეთის პილოტირებული კოსმოსური სააგენტოს (CMSA) ცნობით, ეკიპაჟი, რომელიც მთლიანად მამაკაცებისგან შედგება, ქვეყნის ჩრდილო-დასავლეთით, უდაბნოს რეგიონში მდებარე ჯიუციუანის სატელიტური გაშვების ცენტრიდან 17:17 საათზე (09:17 GMT) გაეშვება. მისიის მეთაურია 46 წლის ყოფილი სამხედრო პილოტი და გამოცდილი კოსმოსის მკვლევარი ჩენ დუნი (Chen Dong). ჩენი 2022 წელს გახდა პირველი ჩინელი ასტრონავტი, რომელმაც ორბიტაზე ჯამურად 200 დღეზე მეტი დაჰყო.
ეკიპაჟის დანარჩენი ორი წევრია 40 წლის ყოფილი სამხედრო-საჰაერო ძალების პილოტი ჩენ ჟუნრუი (Chen Zhongrui) და 35 წლის ყოფილი კოსმოსური ტექნოლოგიების ინჟინერი ვან ჯიე (Wang Jie). ორივე ასტრონავტისთვის ეს კოსმოსში პირველი გაფრენა იქნება.
„დღეს მე კოსმოსში გაფრენის ჩემს ოცნებას ვისრულებ,“ - განაცხადა ჩენ ჟუნრუიმ ოთხშაბათს, ასტრონავტების საზოგადოებისთვის წარდგენის მიზნით გამართულ პრესკონფერენციაზე. ეკიპაჟი ტიანგუნზე ექვსი თვის განმავლობაში ფიზიკისა და სიცოცხლის შემსწავლელი მეცნიერებების სფეროში ექსპერიმენტებს ჩაატარებს, დააყენებს კოსმოსური ნარჩენებისგან დამცავ აღჭურვილობას.
ისინი პირველად წაიღებენ კოსმოსურ ხომალდზე პლანარიებს - რეგენერაციული შესაძლებლობებით ცნობილ წყლის ბრტყელ ჭიებს. ეკიპაჟი ასევე განახორციელებს გასვლებს ღია კოსმოსში, შეავსებს მარაგებს და სადგურის ზოგად ტექნიკურ მომსახურებას უზრუნველყოფს. ამჟამად ტიანგუნზე მყოფი სამი ასტრონავტი მოვალეობების გადაბარების პროცედურების დასრულების შემდეგ 29 აპრილს დედამიწაზე დაბრუნებას გეგმავს.
„ზეციური სასახლე“
23.04.2025-ში გამართული სამთავრობო ტურის დროს, AFP-ის ჟურნალისტები შეესწრნენ, თუ როგორ იყო რაკეტა ცისფერ სასტარტო კოშკზე დამონტაჟებული. წითელი დროშებით გარშემორტყმული რაკეტის ირგვლივ ლურჯ კომბინეზონებში ჩაცმული მუშები გაშვების წინ ბოლო შემოწმებებს ატარებდნენ.
ჩინეთის კოსმოსური პროგრამა, რომელიც მიზნად ისახავს მსოფლიოს ყველაზე დამკვიდრებულ კოსმოსურ ძალებთან, აშშ-სა და რუსეთთან, თანასწორობის მიღწევას, არის მესამე პროგრამა, რომელმაც ადამიანები ორბიტაზე გაიყვანა, და ასევე მარსსა და მთვარეზე რობოტული კვლევითი აპარატები დასვა. ტიანგუნი, სადაც ყოველ ექვს თვეში ერთხელ სამი ასტრონავტისგან შემდგარი ეკიპაჟები როტაციის პრინციპით მუშაობენ, ჩინურად „ციურ სასახლეს“ ნიშნავს და ამ პროგრამის ყველაზე ღირებული ნაწილია.
ჩინეთი, რომელიც 2011 წელს აშშ-ის მიერ NASA-სთვის პეკინთან თანამშრომლობის აკრძალვის შემდეგ საერთაშორისო კოსმოსური სადგურიდან (ISS) გარიყულია, ცდილობს სხვა ქვეყნები საკუთარ კოსმოსურ პროგრამაში ჩართოს. თებერვალში მან დიდი ხნის მოკავშირე პაკისტანთან ტიანგუნზე პირველი უცხოელი ასტრონავტის გაგზავნის შესახებ შეთანხმებას მოაწერა ხელი.
CMSA-მ ოთხშაბათს დაადასტურა, რომ ამ პროცესის ფარგლებში „მოხდება ორი პაკისტანელი ასტრონავტის შერჩევა და ისინი სწავლებისთვის ჩინეთში გაემგზავრებიან“.
