რეჯეფ თაიფ ერდოღანმა თავდაცვის გამოფენა IDEF-ზე განაცხადა, რომ თურქეთი გააგრძელებს ისრაელის მიერ ღაზის მოსახლეობის მიმართ განხორციელებული გენოციდის საკითხის კაცობრიობის დღის წესრიგში დაყენებას, რომელიც, მისი თქმით, „ბევრად აღემატება ნაცისტების ქმედებებს“.
თურქეთის რესპუბლიკის პრეზიდენტმა, რეჯეფ თაიფ ერდოღანმა განაცხადა, რომ ყველა, ვინც ღაზაში მიმდინარე გენოციდზე დუმს, ისრაელის მიერ ჩადენილი კაცობრიობის წინააღმდეგ დანაშაულების თანამონაწილეა.
სტამბოლში გამართულ თავდაცვის მრეწველობის საერთაშორისო გამოფენის (IDEF) გახსნის ცერემონიაზე სიტყვით გამოსვლისას, რეჯეფ თაიფ ერდოღანმა აღნიშნა, რომ თურქეთი გააგრძელებს ისრაელის მიერ ღაზის მოსახლეობის მიმართ განხორციელებული გენოციდის საკითხის, რომელიც „ბევრად აღემატება ნაცისტების ქმედებებს“, კაცობრიობის დღის წესრიგში დაყენებას.
„ჩვენი მიზანია, რაც შეიძლება მალე მივაღწიოთ ცეცხლის შეწყვეტას. ჩვენი კიდევ ერთი პრიორიტეტია ღაზაში ჰუმანიტარული დახმარების შეტანის ნებართვის მიღება“, - განაცხადა ერდოღანმა და დასძინა: „ღაზაში ჰუმანიტარული დახმარების მასალების შეტანის დაუშვებლობის გამო შიმშილისგან ძვალად და ტყავად ქცეული ბავშვების სატკივარი ჩვენი სატკივარია“.
„ვერც ერთი ადამიანი, ვისაც მცირედი ადამიანური ღირსება მაინც გააჩნია, ვერ შეეგუება ისეთ სისასტიკეს, როდესაც ყოველდღიურად ათობით უდანაშაულო ადამიანი ერთი ლუკმა პურისა და ერთი ყლუპი წყლის უქონლობის გამო იღუპება. ამ შავბნელ დღეებში, როდესაც შიმშილისგან მასობრივი სიკვდილიანობა დაიწყო, მოვუწოდებ მთელ საერთაშორისო საზოგადოებას, გაერთიანდეს კაცობრიობის ფრონტზე.“
თურქეთის თავდაცვის მრეწველობის სფეროში განვითარებასთან დაკავშირებით, ერდოღანმა აღნიშნა, რომ ქვეყანამ „ემბარგოების, ორმაგი სტანდარტებისა და დიპლომატიური ზეწოლის“ დაძლევით გლობალურ ძალად იქცა და დღეს თავდაცვის მრეწველობის პროდუქციით მსოფლიო ბაზრებზე თავის კვალს ტოვებს.
„ჩვენი თავდაცვის მრეწველობის ადგილობრივი წარმოების წილი დღეს 80%-ს აჭარბებს“, - განაცხადა ერდოღანმა.
სამშაბათს დაწყებული ექვსდღიანი ღონისძიება პრეზიდენტის პატრონაჟით, ეროვნული თავდაცვის სამინისტროს, თავდაცვის მრეწველობის სამმართველოსა და თურქეთის შეიარაღებული ძალების გაძლიერების ფონდის კოორდინაციით იმართება.
წელს მეჩვიდმეტედ გამართული გამოფენა ერთდროულად ტარდება სტამბოლის საგამოფენო ცენტრში, ათათურქის აეროპორტში, სასტუმრო Wow-სა და ათაქოის მარინაში.
გამოფენაზე წარმოდგენილია ჯავშანტექნიკა, ტაქტიკური ჯავშანმანქანები, უპილოტო სახმელეთო, საჰაერო და საზღვაო აპარატები, შეიარაღების სისტემები, რაკეტები, შორი მოქმედების ტანკსაწინააღმდეგო სარაკეტო სისტემები, ქვეითთა შეიარაღება, სამხედრო სიმულატორები, რადიოელექტრონული ბრძოლის გადაწყვეტილებები, ენერგეტიკული დანადგარები და ასაფეთქებელი ნივთიერებების განადგურების აღჭურვილობა.
გამოფენის მსვლელობისას, რომელიც, სავარაუდოდ, დამთვალიერებელთა დიდ ინტერესს გამოიწვევს, მრავალი ხელშეკრულების გაფორმების ცერემონიაც გაიმართება.
წინა გამოფენა 2023 წლის ივლისში ასევე სტამბოლში ჩატარდა.
