სპარსეთის ყურის ქვეყნებიდან ერთ-ერთმა, კატარმა, დაგმო ირანის მიერ აშშ-ის უდიდეს სამხედრო ბაზაზე განხორციელებული თავდასხმა, რომელსაც მან „სუვერენიტეტის აშკარა დარღვევა“ უწოდა.
კატარის საგარეო საქმეთა სამინისტროს პრესსპიკერმა მაჯიდ ალ-ანსარიმ განაცხადა: „კატარის სახელმწიფო მკაცრად გმობს ირანის რევოლუციის გუშაგთა კორპუსის მიერ ალ-უდეიდის საჰაერო ბაზაზე განხორციელებულ თავდასხმას და მიიჩნევს, რომ ეს არის კატარის სახელმწიფოს სუვერენიტეტისა და საჰაერო სივრცის, ასევე საერთაშორისო სამართლის აშკარა დარღვევა“.
ალ-ანსარიმ ხაზი გაუსვა: „კატარი ინარჩუნებს უფლებას, საერთაშორისო სამართლის ფარგლებში პროპორციული და პირდაპირი პასუხი გასცეს ამ აშკარა აგრესიას“.
მან აღნიშნა, რომ კატარის საჰაერო თავდაცვის სისტემამ წარმატებით გაანეიტრალა ირანის რაკეტები, ხოლო რეგიონში გაზრდილი დაძაბულობის გამო ბაზა წინასწარ, სიფრთხილის მიზნით, ევაკუირებული იყო.
კატარის შეიარაღებული ძალების, მოკავშირე ჯარისკაცებისა და სხვა პერსონალის დასაცავად ბაზაზე ყველა საჭირო ზომა იყო მიღებული.
ალ-ანსარიმ ასევე დაადასტურა, რომ თავდასხმის შედეგად მსხვერპლი არ ყოფილა.
