აშშ-ის პრეზიდენტმა დონალდ ტრამპმა განაცხადა, რომ ცეცხლის შეწყვეტის გასახანგრძლივებლად და ჰორმუზის სრუტის ხელახლა გასახსნელად ირანთან შეთანხმებას „მომავალ კვირაში“ გააფორმებს.
დონალდ ტრამპმა ABC News-თან სატელეფონო ინტერვიუში თქვა: „ყველაფერი კარგად ჩანს, კარგად ჩანს“. „დღეს მცირე შეფერხება მოხდა, მაგრამ ის ძალიან სწრაფად გამოვასწორე, როგორც ალბათ უკვე შენიშნეთ“, - აღნიშნა ტრამპმა და განმარტა, რომ შეფერხება გამოწვეული იყო ირანელების უკმაყოფილებით ლიბანზე ისრაელის თავდასხმების გამო.
ტრამპმა თქვა: „ამიტომ ვესაუბრე ჰეზბოლას და ვუთხარი 'არ ისროლოთ', ვესაუბრე ბიბის (ისრაელის პრემიერ-მინისტრი ბენიამინ ნეთანიაჰუ) და ვუთხარი 'არ ისროლოთ', და მათაც შეწყვიტეს ერთმანეთისთვის სროლა“.
ტრამპის თქმით, ირანთან სამშვიდობო შეთანხმება „სამხედრო გამარჯვებაზე უკეთესიც“ კი შეიძლება იყოს.
რაც შეეხება ცეცხლის შეწყვეტის გახანგრძლივების შეთანხმებისა და სრუტის გახსნის შესახებ ურთიერთგაგების მემორანდუმის გაფორმების დროს, ტრამპმა აღნიშნა: „ვფიქრობ, საუბარია მომავალ კვირაზე, რადგან კიდევ რამდენიმე საკითხი მაქვს მოსაგვარებელი“.
„ბეირუთში ჯარები არ გაიგზავნება“
ორშაბათს, მას შემდეგ რაც ტრამპმა ჰეზბოლასთან „ძალიან კარგი შეხვედრის“ შესახებ განაცხადა, ლიბანმა დაადასტურა, რომ მიიღო წინადადება, რომლის მიხედვითაც ისრაელი შეწყვეტს ბეირუთის სამხრეთზე თავდასხმებს იმის სანაცვლოდ, რომ ჰეზბოლა შეწყვეტს ისრაელზე იერიშებს.
ვაშინგტონში ლიბანის საელჩოს განცხადების თანახმად, რომელიც ლიბანის პრეზიდენტის ადმინისტრაციამ გაავრცელა, ჰეზბოლას მიერ მიღებული შეთანხმების მიხედვით, „ისრაელის თავდასხმები დაჰიეზე“ — ბეირუთის სამხრეთ გარეუბნებზე — „შეწყდება იმის სანაცვლოდ, რომ ჰეზბოლა თავს შეიკავებს ისრაელზე თავდასხმებისგან“.
ისრაელი ორშაბათს ლიბანის დედაქალაქის სამხრეთ გარეუბნების ხელახალი დაბომბვით იმუქრებოდა.
ისრაელის თავდასხმებმა ლიბანში, მათ შორის მძიმე დაბომბვებმა და ბოლო ორი ათწლეულის განმავლობაში ყველაზე ღრმა სახმელეთო შეჭრამ, საფრთხის ქვეშ დააყენა ცეცხლის შეწყვეტის რეჟიმი აშშ-სა და ირანს შორის ახლო აღმოსავლეთის ფართომასშტაბიანი ომის პირობებში.
ტრამპმა ისრაელის პრემიერ-მინისტრ ბენიამინ ნეთანიაჰუსთან გამართული „ძალიან ნაყოფიერი“ შეხვედრის შემდეგ Truth Social-ზე დაწერა: „ბეირუთში ჯარები არ გაიგზავნება, ნებისმიერი ჯარისკაცი, რომელიც უკვე გზაში იყო, უკან დავაბრუნეთ“. მან ასევე დაამატა: „ანალოგიურად, მაღალი დონის წარმომადგენლების მეშვეობით ძალიან კარგი შეხვედრა მქონდა ჰეზბოლასთან და ისინი დათანხმდნენ მთელი კონფლიქტის შეწყვეტას — ისრაელი მათ არ დაესხმება თავს და არც ისინი დაესხმიან თავს ისრაელს“.
