ევროკავშირმა რუსეთის წინააღმდეგ აქამდე "ყველაზე ძლიერი" სანქციების პაკეტი დაამტკიცა. პაკეტი მოიცავს Nord Stream-ის მილსადენებიდან იმპორტის აკრძალვას და ნავთობის ექსპორტზე უფრო მკაცრ შეზღუდვებს. განცხადება ევროკავშირის საგარეო ურთიერთობათა უმაღლესმა წარმომადგენელმა პარასკევს გააკეთა.
"ჩვენ მტკიცედ ვდგავართ. ევროკავშირმა რუსეთის წინააღმდეგ აქამდე ერთ-ერთი ყველაზე ძლიერი სანქციების პაკეტი დაამტკიცა", - დაწერა ესტონეთის პრემიერ-მინისტრმა კაია კალასმა X-ის პლატფორმაზე და აღნიშნა:
"Nord Stream-ის მილსადენებიდან იმპორტი აიკრძალება. ნავთობისთვის დაწესდება ლიმიტის უფრო დაბალი ფასი. ჩვენ ვზრდით ზეწოლას რუსეთის სამხედრო ინდუსტრიაზე, ჩინურ ბანკებზე, რომლებიც სანქციების გვერდის ავლაში ეხმარებიან და დრონებში გამოყენებული ტექნოლოგიების ექსპორტზე."
კალასმა ხაზი გაუსვა, რომ ევროკავშირი სანქციებს დაუწესებს რუსეთის "ჩრდილოვან ფლოტთან" დაკავშირებულ კიდევ 105 გემს და რუსულ ბანკებს შეუზღუდავს წვდომას საერთაშორისო დაფინანსების წყაროებზე. მან რუსეთ-უკრაინის ომი მოსკოვის წინააღმდეგ სანქციების დაწესების მთავარ მიზეზად დაასახელა და დასძინა: "ჩვენ კიდევ უფრო ვამცირებთ კრემლის საომარ ბიუჯეტს".
კალასმა განაცხადა, რომ ევროკავშირი პირველად დაუწესებს სანქციებს უცხო ქვეყნის დროშის ქვეშ რეგისტრირებულ კომპანიას და რუსული კომპანია "როსნეფტის" უმსხვილესი გადამამუშავებელი ქარხანა ინდოეთში ასევე დაემატება სანქციების სიას.
"ჩვენი სანქციები მოიცავს მათაც, ვინც უკრაინელ ბავშვებზე იდეოლოგიურ გავლენას ახდენს", - განაცხადა კალასმა და დასძინა: "ჩვენ გავაგრძელებთ ხარჯების გაზრდას, რათა მოსკოვისთვის აგრესიის შეჩერება ერთადერთ ვარიანტად იქცეს".
