საფრანგეთი აშშ-ზე დამოკიდებულების შესამცირებლად ევროპულ საგადახდო სისტემას ითხოვს

BFM TV-ს მიერ გავრცელებული ინფორმაციით, საფრანგეთის პრეზიდენტმა ემანუელ მაკრონმა სუვერენული ევროპული საგადახდო სისტემის შექმნისკ მოწოდება გააკეთა.

სამშაბათს, საფრანგეთის საბარათე გადახდების (Carte Bancaire) სამიტზე გაგზავნილ ვიდეომიმართვაში მაკრონმა განაცხადა, რომ საგადახდო სისტემები „სუვერენიტეტის ფუნდამენტური ნაწილია“.

ევროპული საგადახდო ინიციატივის (EPI) ფარგლებში შემუშავებულ ევროპულ გადაწყვეტილებებზე, მათ შორის Wero-ზე მითითებით, მაკრონმა აღნიშნა: „ჩვენ უნდა შევქმნათ გადახდის სუვერენული მოდელი“.

Wero, რომელიც ფიზიკურ პირებს შორის მყისიერ გადახდებს უზრუნველყოფს და ვაჭრობის სფეროში გაფართოებას ისახავს მიზნად, ევროპული საბანკო ანგარიშებიდან პირდაპირი ტრანზაქციების განხორციელების შესაძლებლობას იძლევა.

Wero უწევს კონკურენციას ისეთ სერვისებს, როგორიცაა PayPal ან Apple Pay, და ის ფინანსური ნაკადებისა და მონაცემების ევროპაში შესანარჩუნებლად შეიქმნა.

გადახდებზე კონტროლის შესახებ მაკრონმა შემდეგი განაცხადა: „გადახდებზე კონტროლის დათმობა ნიშნავს იმის აღიარებას, რომ ჩვენი ტრანზაქციების არსი დამოკიდებულია იმ აქტორებზე, რომლებიც ჩვენთან ერთ ხაზზე არ დგანან და არ გააჩნიათ იგივე ინტერესები“.

მაკრონმა აღნიშნა, რომ მიმოქცევაში არსებული 77 მილიონზე მეტი ბარათით საფრანგეთის საბარათე გადახდების ჯგუფი შიდა ბაზრის ტრანზაქციებში დომინირებს, თუმცა აშშ-ის ქსელებისა და მობილური საგადახდო გადაწყვეტილებების მხრიდან კონკურენციას აწყდება.

მაკრონმა, რომელიც მანამდეც ამტკიცებდა, რომ ევროკავშირმა აშშ-სგან უფრო დამოუკიდებელი გზა უნდა აირჩიოს, ირანის წინააღმდეგ აშშ-ისრაელის ომში დიპლომატიისა და თავშეკავებისკენ მოუწოდა და პალესტინის სახელმწიფო ოფიციალურად აღიარა.