როგორც ადგილობრივი მედია იტყობინებოდა, მალაიზიის მთავრობა ემზადება ისრაელს მართლმსაჯულების საერთაშორისო სასამართლოში უჩივლოს ღაზისკენ მიმავალი გლობალური სუმუდის ჰუმანიტარული დახმარების ფლოტილიის აქტივისტების გატაცებისა და წამების ბრალდებით.

„Malay Mail“-ის ცნობით, მალაიზიის სელანგორის შტატის პრემიერ-მინისტრმა ამირუდინ შარიმ განაცხადა, რომ მას შემდეგ, რაც იურისტები დაასრულებენ ინფორმაციისა და მტკიცებულებების შეგროვების პროცესს, კუალა-ლუმპური სასამართლო პროცესს დაიწყებს.

ფლოტილიის 400-ზე მეტი საერთაშორისო აქტივისტი, რომელთა მიზანიც ღაზისთვის დახმარების მიწოდება და ისრაელის საზღვაო ბლოკადის გარღვევა იყო, გასულ კვირას საერთაშორისო წყლებში ისრაელის ძალების თავდასხმის მსხვერპლი გახდა და დააკავეს.

კუალა-ლუმპურის საერთაშორისო აეროპორტში გლობალური სუმუდის ფლოტილია 2.0“-ის დახვედრის ცერემონიაზე სიტყვით გამოსვლისას ამირუდინმა თქვა: „ჩვენ არ გავჩუმდებით, არ გავჩერდებით. სანამ იურიდიული გუნდი საერთაშორისო სამართლის დარღვევის შესახებ ყველა დოკუმენტს აგროვებს, ისინი (აქტივისტები) არაერთხელ გაიტაცეს და აწამეს“.

„ამ საკითხს საერთაშორისო სასამართლოში წარვადგენთ, გავაგრძელებთ დიპლომატიურ ზეწოლას და ვიმუშავებთ მთელი მალაიზიის მასშტაბით“, - აღნიშნა მან.

ამირუდინმა განმარტა, რომ ეს სამართლებრივი ნაბიჯი მოჰყვა ბრალდებებს ფლოტილიის აქტივისტების, მათ შორის მალაიზიელი მონაწილეების, მიმართ ჩადენილი ისეთი სისასტიკეების შესახებ, როგორიცაა გატაცება და წამება. მისი თქმით, ამ პროცესს მოჰყვება მთავრობის დიპლომატიური ზეწოლა ღაზის „სრული თავისუფლების“ მოთხოვნით.

ამირუდინმა ხაზგასმით აღნიშნა, რომ მიუხედავად იმისა, რომ გლობალური სუმუდის ფლოტილია 2.0-მა მისია დასრულდა, მალაიზიისა და სელანგორის ერთგულება პალესტინის საქმისადმი გაგრძელდება. მან ასევე დასძინა, რომ ადვოკატირების გაძლიერების მიზნით, იგეგმება მომავალში პალესტინასთან დაკავშირებული საერთაშორისო კონფერენციების მალაიზიაში ჩატარება.

ამირუდინმა დაამატა, რომ „სუმუდი 3.0“ გააგრძელებს ბრძოლას ღაზის ბლოკადის მოხსნამდე.