გაეროს გენერალური მდივნის პრესსპიკერმა სტეფან დიუჟარიკმა ყოველდღიურ პრესკონფერენციაზე ისაუბრა.
„გენერალური მდივანი ღრმად არის შეშფოთებული ბოლო რამდენიმე დღის განმავლობაში ირანსა და აშშ-ს შორის მიმდინარე და მზარდი სამხედრო დაძაბულობით“, - განაცხადა დიუჟარიკმა და აღნიშნა, რომ კრიზისი გავლენას ახდენს რეგიონის ყველა ქვეყანაზე, ახორციელებს ზეწოლას სავაჭრო სისტემებზე, ჰუმანიტარულ დახმარებაზე ხელმისაწვდომობაზე, ტრანსპორტირების ხარჯებზე, ასევე საწვავისა და პირველადი მოთხოვნილების საქონლის ფასებზე როგორც ამ რეგიონის ქვეყნებში, ისე მათ ფარგლებს გარეთ.
დიუჟარიკმა აღნიშნა: „გენერალური მდივანი ასევე შეშფოთებულია სამოქალაქო ინფრასტრუქტურაზე თავდასხმებით, მათ შორის ირანში მშენებარე ატომურ ელექტროსადგურსა და წყლის გამწმენდ ნაგებობაზე, ასევე რეგიონის მასშტაბით ქუვეითსა და სხვა ადგილებში არსებულ ელექტროსადგურებსა და წყლის გამწმენდ ობიექტებზე განხორციელებული თავდასხმებით“.
დიუჟარიკის თქმით, გუტერეშმა ხაზგასმით აღნიშნა, რომ „მსგავსი თავდასხმები მიუღებელია და დაუყოვნებლივ უნდა შეწყდეს“. მან ასევე დასძინა: „გენერალური მდივანი იმეორებს, რომ ამ კონფლიქტს სამხედრო გადაწყვეტა არ გააჩნია და მოუწოდებს დიპლომატიური ძალისხმევის გააქტიურებისკენ მშვიდობიანი და ხანგრძლივი გადაწყვეტის მისაღწევად“.
პრესსპიკერმა აღნიშნა, რომ მხარეებს შორის მიღწეული შეთანხმება უნდა მოიცავდეს ჰორმუზის სრუტესა და მის შემოგარენში საერთაშორისო ნაოსნობის უფლებებისა და თავისუფლების სრულ აღდგენას.
