თურქეთის პრეზიდენტმა რეჯეფ თაიფ ერდოღანმა ხუთშაბათს ირანის პრეზიდენტ მასუდ ფეზეშქიანთან გამართული სატელეფონო საუბრისას განაცხადა, რომ თურქეთი ეწინააღმდეგება ირანის მიმართ ნებისმიერ გარე ჩარევას და მნიშვნელოვნად მიიჩნევს თავისი მეზობლების მშვიდობასა და სტაბილურობას. განცხადება პრეზიდენტის ადმინისტრაციამ სოციალურ ქსელ X-ის მეშვეობით გაავრცელა.
პრეზიდენტის ადმინისტრაციის განცხადებაში აღნიშნულია, რომ საუბრისას ირანში მიმდინარე ბოლო მოვლენები განიხილეს. დაფიქსირდა, რომ ერდოღანმა ასევე გამოთქვა მოსაზრება, რომ პრობლემების გადაჭრა ახალი ესკალაციის გარეშე თურქეთის ინტერესებში შედის.
ირანი ბოლო წლების ყველაზე მასშტაბურმა ანტისამთავრობო პროტესტებმა შეძრა. საპროტესტო აქციების წინააღმდეგ განხორციელებული ფართომასშტაბიანი უსაფრთხოების ოპერაციების შემდეგ, ქვეყნის სულიერმა ლიდერმა ალი ხამენეიმ შაბათს განაცხადა, რომ მომხდარი მოვლენების დროს „რამდენიმე ათასი“ ადამიანი დაიღუპა. ეს განცხადება ირანელი მაღალჩინოსნის მხრიდან მსხვერპლის მასშტაბების შესახებ გაკეთებული პირველი ღია დადასტურება იყო. ხამენეიმ დაღუპულთა გამო პასუხისმგებლობა ამერიკის შეერთებულ შტატებს დააკისრა.
საპროტესტო აქციები და გაფიცვები, რომლებიც თავდაპირველად ეკონომიკური სირთულეების გამო დაიწყო, გადაიზარდა მასობრივ მოძრაობაში რელიგიური მმართველობის წინააღმდეგ, რომელიც ქვეყანას 1979 წლის რევოლუციის შემდეგ მართავს. 8 იანვრიდან მოყოლებული, რამდენიმე დღის განმავლობაში მიმდინარე აქციებზე ქუჩაში ასობით ათასი ადამიანი გამოვიდა.
ოთხშაბათს ირანის საგარეო საქმეთა მინისტრმა ვაშინგტონის მიმართ აქამდე არსებული ყველაზე მკაცრი გაფრთხილება გააჟღერა და განაცხადა, რომ „ხელახალი თავდასხმის შემთხვევაში, ისლამური რესპუბლიკა ყველა არსებული საშუალებით გასცემს პასუხს“.
ხელისუფლების წარმომადგენლების მხრიდან პირველი ოფიციალური მონაცემები იმავე დღეს გამოქვეყნდა. სახელმწიფო ტელევიზიის ინფორმაციით, ირანის „ვეტერანთა და მოწამეთა ფონდმა“ გამოაცხადა, რომ საპროტესტო აქციების დროს 3 117 ადამიანი დაიღუპა.
