თურქეთის რესპუბლიკის საგარეო საქმეთა მინისტრმა ჰაქან ფიდანმა 7-8 ივლისს ანკარაში დაგეგმილ ნატოს სამიტთან დაკავშირებით აღნიშნა: „არის ძალიან მნიშვნელოვანი საკითხები, რომელთა გადაწყვეტა აშშ-ის პრეზიდენტის გარეშე შეუძლებელია. ბევრი ევროპული ქვეყანა მიიჩნევს, რომ სამიტის თურქეთში გამართვა პრეზიდენტ ერდოღანის მასპინძლობით, იყო გადამწყვეტი ფაქტორი ტრამპის მონაწილეობისთვის“.

რუსეთში ვიზიტისას მინისტრმა ფიდანმა თურქულ მედიასთან მიმდინარე დღის წესრიგი შეაფასა. მან აღნიშნა, რომ მოსკოვში გამართულმა შეხვედრებმა აჩვენა, რომ ორმხრივ ურთიერთობებსა და რეგიონულ საკითხებში თანამშრომლობის კუთხით სერიოზული პრობლემები არ არსებობს და ორივე ქვეყანას სურს პარტნიორობის გაღრმავება ყველა შესაძლო სფეროში.

რუსეთ-უკრაინის ომი და მოლაპარაკებები

მინისტრმა ფიდანმა განაცხადა: „რუსეთში გამართული შეხვედრებისას დავინახე, რომ რუსი მაღალჩინოსნების პოზიცია უკრაინის საკითხზე არ შეცვლილა. ისინი აცხადებენ: ‘დონეცკის საკითხის მოგვარების გარეშე „მშვიდობის“ შანსი არ არსებობს’“.

სამხრეთ კავკასია და ცენტრალური აზია

ვიზიტის ფარგლებში ხაზი გაესვა სამხრეთ კავკასიაში „3+3 მექანიზმის“ ამოქმედების აუცილებლობას. ფიდანის თქმით, ეს არის უმნიშვნელოვანესი პლატფორმა თურქეთს, რუსეთს, აზერბაიჯანს, ირანს, სომხეთსა და საქართველოს შორის თანამშრომლობის გასაღრმავებლად. მან დაამატა:

„ჩვენ, რეგიონის ქვეყნებმა, უნდა დავინახოთ, რომ კონკურენციისა და დომინირების ნაცვლად, წინა პლანზე თანამშრომლობა უნდა წამოვწიოთ. ამ მიდგომის გარკვეულ პროგრესს ვხედავთ ახლო აღმოსავლეთის ბოლო მოვლენების ფონზეც. იმავე ხედვით შეგვიძლია გავაძლიეროთ ჩვენი ეკონომიკები და სტაბილურობა სამხრეთ კავკასიასა და ცენტრალურ აზიაში. დომინირების ძიება უნდა დასრულდეს. მშვიდობა და სტაბილურობა ყველას ინტერესებშია. ჩვენი ხედვა უნდა შევცვალოთ“.

სომხეთთან ნორმალიზაციის პროცესი

სომხეთთან ურთიერთობების ნორმალიზაციაზე საუბრისას ფიდანმა აღნიშნა, რომ ფაშინიანის მთავრობამ მნიშვნელოვანი ნაბიჯები გადადგა. პრეზიდენტ ერდოღანის ნებით დაიწყო პირდაპირი ვაჭრობა და აღდგა ფრენები. ფიდანმა დასძინა: „ჩვენ მზად ვართ ნორმალიზაციისთვის, როგორც კი შესაბამისი პირობები სრულად ჩამოყალიბდება“.

აშშ-ირანის შეთანხმება

აშშ-ირანის მემორანდუმთან დაკავშირებით ფიდანმა აღნიშნა, რომ ტექნიკურმა გუნდებმა დეტალებზე უნდა იმუშაონ. მისი თქმით, ბირთვულ დოსიეში ორი მთავარი საკითხია:

რა ბედი ეწევა გამდიდრებულ ურანს?

როგორ იმუშავებს გამდიდრების შემდგომი მორატორიუმი?

არსებობს პრინციპული შეთანხმება ირანში არსებული 400 კგ გამდიდრებული ურანის გაზავებაზე, თუმცა გასარკვევია, ვინ განახორციელებს ამას, ვინ გააკონტროლებს და როგორ მოხდება მისი ვერიფიკაცია.

ისრაელის აგრესიული და ექსპანსიონისტური პოლიტიკა

ფაიდანმა ხაზი გაუსვა, რომ ისრაელის აგრესიული ქმედებები უკვე მთელი მსოფლიოს პრობლემაა და არა მხოლოდ თურქეთის. „ისრაელს რეგიონში ნგრევა სურს. მას სურს ზოგიერთი ქვეყნის ოკუპაცია და ტერორის გამოყენება. ამას აქვს გლობალური გავლენა როგორც უსაფრთხოებაზე, ისე ეკონომიკაზე. ვხედავთ, რომ ისრაელი სულ უფრო მეტ დიპლომატიურ წინააღმდეგობას აწყდება. ვიმედოვნებთ, რომ ეს რეაქცია გამოიღებს შედეგს და რეგიონის ყველა ქვეყანა მშვიდობასა და კეთილდღეობაში იცხოვრებს“, განაცხადა ფიდანმა.