იაპონიის ოფიციალურმა პირებმა სამშაბათს განაცხადეს, რომ ქვეყანაში მოსულმა უჩვეულოდ დიდმა თოვლმა ბოლო ორ კვირაში 30 ადამიანი იმსხვერპლა. მათ შორის ერთ-ერთი 91 წლის ქალია, რომელიც საკუთარ სახლთან, თოვლის სამმეტრიანი ფენის ქვეშ მოჰყვა.

ცენტრალურმა მთავრობამ ყველაზე მეტად დაზარალებული აომორის პრეფექტურის მოსახლეობის დასახმარებლად ჯარი გაგზავნა. ზოგიერთ მოშორებულ რაიონში თოვლის საფარის სიმაღლემ 4,5 მეტრს მიაღწია.

პრემიერ-მინისტრმა სანაე ტაკაიჩიმ სამშაბათს დილით მინისტრებთან საგანგებო თათბირი გამართა და დაავალა, ყველაფერი გააკეთონ ფატალური შემთხვევებისა და უბედური შემთხვევების თავიდან ასაცილებლად.

ძლიერმა ცივმა მასებმა ბოლო კვირებში იაპონიის ზღვის სანაპიროზე დიდთოვლობა გამოიწვია. ზოგიერთ რაიონში ნორმაზე ორჯერ მეტი თოვლი მოვიდა.

ხანძრისა და სტიქიური უბედურებების მართვის სააგენტოს ცნობით, მხოლოდ 20 და 21 იანვარს დიდთოვლობის გამო 30 ადამიანი გარდაიცვალა.

დაღუპულთა შორის იყო 91 წლის კინა ჯინი, რომლის ცხედარიც აომორის პრეფექტურის ქალაქ აჯიგასავაში, თოვლის გროვის ქვეშ იპოვეს. ადგილობრივმა პოლიციელმა სააგენტო AFP-სთან საუბრისას აღნიშნა, რომ სახურავიდან ჩამოწოლილმა თოვლმა ქალის გაგუდვა (ასფიქსია) გამოიწვია. ცხედართან ნიჩაბი იპოვეს.

„ტემპერატურის მატებასთან ერთად დაგროვილი თოვლი დნება და ცვივა. ეს, რა თქმა უნდა, თოვლის რაოდენობასა და ტემპერატურაზეა დამოკიდებული. სახურავების ქვეშ ყოფნა სახიფათოა“, - განუცხადა ოფიციალურმა პირმა AFP-ს.

აომორის გუბერნატორმა სოიჩირო მიიაშიტამ ორშაბათს განაცხადა, რომ სტიქიასთან გამკლავებაში დახმარებისთვის იაპონიის თავდაცვის ძალებს მიმართა.

მიიაშიტამ დახმარება იმ ხანდაზმულებისთვის ითხოვა, რომლებიც მარტო ცხოვრობენ და თოვლისგან ტერიტორიის გაწმენდაში მხარდაჭერა სჭირდებათ.

გუბერნატორის თქმით, პრეფექტურის დედაქალაქ აომორიში 1,8 მეტრის სიმაღლის თოვლის კედლები აღიმართა, რის გამოც გზებისა და სახლების თოვლისგან გაწმენდა ვერ ხერხდება.

„არსებობს სახურავებიდან თოვლის ჩამოწოლის ან შენობების ჩამონგრევის შედეგად სიკვდილის საფრთხე“, - განაცხადა გუბერნატორმა პრესკონფერენციაზე.