ესპანეთის პრემიერ-მინისტრმა, პედრო სანჩესმა, განაცხადა, რომ იბერიის ნახევარკუნძულზე ცხოვრების თითქმის პარალიზების გამომწვევი ელექტროენერგიის გათიშვის შემდეგ, ესპანეთის ელექტროქსელის ოპერატორმა კომპანიამ ქვეყნის დაახლოებით ნახევარს ელექტროენერგიის მიწოდება აღუდგინა და ქვეყნის დანარჩენ ნაწილში ვითარება სამშაბათისთვის სრულად ნორმალიზდება.
სანჩესმა ერთ-ერთ ტელეარხთან საუბრისას თქვა, რომ ორშაბათს საღამოს მდგომარეობით, ოფიციალურ პირებს გათიშვის მიზეზი ჯერ დადგენილი არ ჰქონდათ და არცერთ ვერსიას არ გამორიცხავდნენ.
პორტუგალიის პრემიერ-მინისტრმა, ლუის მონტენეგრომ, თქვა, რომ გათიშვების შემდეგ, რომლებიც მთელი დღის განმავლობაში იბერიის ნახევარკუნძულის დიდ ნაწილს შეეხო, ქვეყანაში ელექტრომომარაგება უახლოეს საათებში სრულად აღდგება. მონტენეგრომ აღნიშნა, რომ ყველა სირთულის მიუხედავად, ქვეყნის მასშტაბით სახელმწიფო დაწესებულებები მუშაობას აგრძელებდნენ. მან პრესკონფერენციაზე თქვა: „ჩვენს ელექტროქსელში ფართომასშტაბიანი გათიშვა, სავარაუდოდ, ქვეყნის გარეთ, ესპანეთში მომხდარი ინციდენტით არის გამოწვეული“. მონტენეგრუმ ასევე განაცხადა, რომ ქვეყნის მასშტაბით ელექტროენერგიის მიწოდება „უახლოეს რამდენიმე საათში“ სრულად აღდგება.
ამასობაში, ევროპული საბჭოს პრეზიდენტმა ანტონიო კოსტამ აღნიშნა, რომ ამჟამად არ არსებობს რაიმე მტკიცებულება კიბერშეტევის შესახებ, რომელიც ესპანეთსა და პორტუგალიაში მომხდარ მასშტაბურ ელექტროენერგიის გათიშვებს უკავშირდება. კოსტამ თქვა, რომ ესპანეთსა და პორტუგალიაში მიმდინარე ელექტროენერგიის გათიშვის შესახებ სანჩესსა და მონტენეგროს ტელეფონით ესაუბრა.
კოსტამ X-ზე თავის პოსტში აღნიშნა: „ორივე ქვეყნის ქსელის ოპერატორები მუშაობენ გათიშვის მიზეზის დასადგენად და ელექტროენერგიის მიწოდების აღსადგენად. ამჟამად კიბერშეტევის რაიმე ნიშანი არ შეინიშნება“.
ელექტროენერგიის მიწოდება ორშაბათს, შუადღისას, შეწყდა პორტუგალიის, ესპანეთისა და ანდორის (მიკროსახელმწიფო საფრანგეთსა და ესპანეთს შორის) დიდ ნაწილში. გათიშვები საფრანგეთის ზოგიერთ რეგიონსაც შეეხო.
ოფიციალური პირები გათიშვის მიზეზების გამოძიებას აგრძელებენ. ესპანეთის კიბერუსაფრთხოების ეროვნული ინსტიტუტი ასევე იკვლევს, იყო თუ არა გათიშვების მიზეზი კიბერშეტევა.
