კომუნიკაციების სამმართველოს სოციალური ქსელის ანგარიშზე გამოქვეყნებული ინფორმაციის თანახმად, შეხვედრაში მონაწილეობდნენ აშშ-ის პრეზიდენტი დონალდ ტრამპი, ბაჰრეინის მეფე ჰამედ ბინ ისა ალ-ხალიფა, არაბთა გაერთიანებული საამიროების პრეზიდენტი შეიხ მუჰამედ ბინ ზაიდ ალ ნაჰიანი, კატარის ემირი შეიხ თამიმ ბინ ჰამად ალ სანი, ეგვიპტის პრეზიდენტი აბდელ ფათაჰ ალ-სისი, საუდის არაბეთის ტახტის მემკვიდრე პრინცი მუჰამედ ბინ სალმანი, იორდანიის მეფე აბდულა II და პაკისტანის გენერალური შტაბის უფროსი ასიმ მუნირი, ასევე აშშ-ის პრეზიდენტის კაბინეტის წევრები.
პრეზიდენტმა ერდოღანმა შეხვედრაზე, სადაც ირანსა და ახლო აღმოსავლეთში მიმდინარე მოვლენები განიხილეს, განაცხადა, რომ თურქეთი ყოველთვის მხარს უჭერს პრობლემების დიალოგისა და დიპლომატიის გზით გადაჭრას; მან კმაყოფილება გამოთქვა იმის გამო, რომ ირანთან დიპლომატიურმა პროცესმა აშშ-ის პრეზიდენტ ტრამპის მიერ გაჟღერებულ დონეს მიაღწია და აღნიშნა, რომ მისაღწევი შეთანხმება ჰორმუზის სრუტეში თავისუფალ მიმოსვლას უზრუნველყოფს, რაც ხელს შეუწყობს რეგიონის სტაბილურობას და მსოფლიო ეკონომიკასაც შვებას მოჰგვრის.
მოლაპარაკებების პროცესში წვლილის შემტან ქვეყნებს მადლობა გადაუხადა და აღნიშნა, რომ თურქეთი მზად არის გაწიოს ყოველგვარი მხარდაჭერა ირანთან შესაძლო შეთანხმების იმპლემენტაციის ეტაპზე. მან ხაზი გაუსვა, რომ თურქეთი ძალისხმევას არ იშურებს მთელ რეგიონში მშვიდობის დასამყარებლად და გამოთქვა რწმენა, რომ ირანთან დაკავშირებულ სადავო საკითხებზე, მათ შორის ბირთვულ თემაზე, პროცესის განმავლობაში შესაბამისი გადაწყვეტილებები მოიძებნება.
პრეზიდენტმა ერდოღანმა შეხვედრაზე ხაზგასმით აღნიშნა, რომ თურქეთს სურს ახალი ეპოქა, სადაც რეგიონის ქვეყნები ერთმანეთისთვის საფრთხეს არ შექმნიან და რომ სამართლიან მშვიდობას წაგებული არ ეყოლება.
