თურქეთმა მცირეწლოვანი ბავშვებისთვის კატასტროფებისადმი მზადყოფნის პირველი ეროვნული პროგრამა დაიწყო

თურქეთში მიწისძვრებისა და კლიმატთან დაკავშირებული საფრთხეებისადმი მოწყვლადობის გამო მზარდი შეშფოთების ფონზე, ამოქმედდა კლიმატისა და კატასტროფებისადმი მზადყოფნის პირველი ეროვნული საგანმანათლებლო პროგრამა, რომელიც სპეციალურად 4-დან 8 წლამდე ასაკის ბავშვებისთვისაა შექმნილი.

პროგრამა, რომელიც თურქეთის კატასტროფებისა და საგანგებო სიტუაციების მართვის სამმართველოს (AFAD) და ჰუმანიტარული ორგანიზაცია „Save the Children Türkiye“-ს პარტნიორობით შემუშავდა, ოფიციალურად 24 დეკემბერს წარადგინეს და მისი ეტაპობრივი დანერგვა მთელი ქვეყნის მასშტაბით დაიწყო.

ინიციატივა, რომელიც განათლების სამინისტროსთან კოორდინაციით ხორციელდება, მიზნად ისახავს ბავშვებს კლიმატური და კატასტროფების რისკების გააზრებაში დაეხმაროს ისეთი ფორმით, რაც მათ შესაძლებლობებსა და თავდაჯერებულობას გაზრდის.

„თურქეთში ბევრი ბავშვი იზრდება სხვადასხვა რისკის გარემოცვაში - მიწისძვრებიდან ხანძრებამდე, წყალდიდობებიდან კლიმატური კრიზისის შედეგებამდე. AFAD-თან ერთად მუშაობით, ჩვენ გადავდგით ნაბიჯი, რათა ეს რეალობა ბავშვებისთვის უფრო უსაფრთხო და გასაგები გავხადოთ“, - განაცხადა „Save the Children Türkiye“-ს ქვეყნის დირექტორმა, ბერნა ქოროღლუმ.

რა შედის პროგრამაში?

პროგრამა მოიცავს 16 ინტერაქციულ სასწავლო მოდულს, რომლებიც სპეციალურად 4-5 და 6-8 წლის ასაკობრივი ჯგუფებისთვისაა შექმნილი.

მოდულები ამბების, სიმღერების, ხელოვნებისა და მოძრაობაზე დაფუძნებული აქტივობების მეშვეობით ბავშვებს აცნობს ძირითად ცნებებს კლიმატის, ამინდის მოვლენებისა და იმ ზომების შესახებ, რომელთა მიღებაც მათ შეუძლიათ კატასტროფამდე, კატასტროფის დროს და მის შემდეგ.

ორგანიზაციის წარმომადგენლები აცხადებენ, რომ იგეგმება ამ შინაარსის ინტეგრირება ეროვნულ საგანმანათლებლო საქმიანობაში და მისი გავრცელება სკოლამდელი აღზრდის დაწესებულებებსა და დაწყებით სკოლებში, რათა პროგრამამ მილიონობით ბავშვს მიაღწიოს.

პროგრამის გაფართოების პირველი ეტაპი სტამბოლში უკვე მიმდინარეობს. 39-ვე რაიონში მასწავლებლებმა ტრენინგების გავლა დაიწყეს. სხვა პროვინციებში პროგრამის დანერგვა ეტაპობრივადაა დაგეგმილი.

AFAD-ის წარმომადგენლებმა აღნიშნეს, რომ მასწავლებელთა გადამზადება საკვანძოა ქვეყნის მასშტაბით საკლასო ოთახებში კატასტროფების შესახებ ცნობიერების მუდმივი და ფართო გავრცელებისთვის.

„მასწავლებლები ჩვენი ყველაზე ძვირფასი გზამკვლევები არიან; ისინი პირველი საკონტაქტო პირები არიან ჩვენს შვილებთან, რომლებიც მათ მიმართულებას აძლევენ და უსაფრთხოების განცდას უმტკიცებენ. კატასტროფების შესახებ ცნობიერების საკლასო ოთახებში შეტანა დაეხმარება ამ ცოდნას, გახდეს მუდმივი და გავრცელდეს მთელი ქვეყნის მასშტაბით“, - განაცხადა AFAD-ის სტამბოლის სამმართველოს საგანმანათლებლო და ცნობიერების ამაღლების სამსახურის უფროსმა, დამლა დერელი ბულუთმა.