საინფორმაციო სააგენტო „Interfax-ის“ ცნობით, რუსეთის უშიშროების საბჭოს თავმჯდომარის მოადგილემ, დიმიტრი მედვედევმა განაცხადა, რომ თუ აშშ-ის პრეზიდენტი დონალდ ტრამპი სწრაფად არ იმოქმედებს არქტიკული კუნძულის ხელში ჩასაგდებად, გრენლანდიელებმა შესაძლოა რუსეთთან შეერთების სასარგებლოდ მისცენ ხმა.
რუსეთის ყოფილმა პრეზიდენტმა აღნიშნა: „ტრამპმა უნდა იჩქაროს. გადაუმოწმებელი ინფორმაციით, რამდენიმე დღეში შესაძლოა მოულოდნელად რეფერენდუმი ჩატარდეს და გრენლანდიის მთელმა 55-ათასიანმა მოსახლეობამ რუსეთთან შეერთებას მისცეს ხმა“. მედვედევმა დასძინა: „და ამით ყველაფერი დასრულდება. (აშშ-ის) დროშაზე ახალი პატარა ვარსკვლავები ვეღარ დაემატება“.
ტრამპმა კვლავ წამოწია დანიის დაქვემდებარებაში მყოფი ავტონომიური რეგიონის – გრენლანდიის კონტროლის საკითხი და ამტკიცებს, რომ ვაშინგტონს კუნძული რუსეთის შესაკავებლად სჭირდება. აშშ-ის პრეზიდენტი აცხადებს, რომ გრენლანდიის მდებარეობა და რესურსები მას ეროვნული უსაფრთხოებისთვის სასიცოცხლო მნიშვნელობისად აქცევს, თუმცა ამ ინიციატივას დანიისა და გრენლანდიის მხრიდან მკაცრი პროტესტი მოჰყვა.
მიუხედავად იმისა, რომ რუსეთს გრენლანდიაზე პრეტენზია არ გააჩნია, მოსკოვი დიდი ხანია აკვირდება კუნძულის სტრატეგიულ როლს არქტიკის უსაფრთხოებაში, მისი ჩრდილოატლანტიკური მარშრუტების და იქ განთავსებული აშშ-ის მსხვილი სამხედრო და კოსმოსური სათვალთვალო ობიექტების გამო.
კრემლს ტრამპის ამ ნაბიჯზე ოფიციალური კომენტარი არ გაუკეთებია, თუმცა გასულ წელს არქტიკა რუსეთის ეროვნული და სტრატეგიული ინტერესების ზონად განსაზღვრა და აღნიშნა, რომ ყურადღებით აკვირდება გრენლანდიის ირგვლივ მიმდინარე „საკმაოდ დრამატულ“ დისკუსიას.
რუსეთ-უკრაინის ომმა არქტიკის რეგიონში თანამშრომლობის დიდი ნაწილი შეაფერხა. კლიმატის ცვლილების შედეგად ახალი მარშრუტებისა და რესურსების ხელმისაწვდომობის გამო, რეგიონი კიდევ უფრო კონკურენტული და სადავო გახდა.
