რუსეთის თავდაცვის სამინისტრომ ოთხშაბათს განაცხადა, რომ უკრაინულმა ძალებმა, სამოქალაქო ობიექტების დაზიანების მიზნით, სამხრეთით მდებარე ქალაქ ვორონეჟის მიმართულებით აშშ-ის წარმოებული ოთხი ATACMS-ის რაკეტა გაუშვეს.

სამშაბათს უკრაინის არმიამ განაცხადა, რომ აშშ-ის მიერ მიწოდებული ATACMS-ის რაკეტებით რუსეთის ტერიტორიაზე სამხედრო ობიექტებს დაარტყა და ეს „მნიშვნელოვანი მოვლენაა“.

უკრაინას, რომელმაც აღნიშნული სისტემები 2023 წელს მიიღო, თავდაპირველად დაწესებული ჰქონდა შეზღუდვა, რომ ისინი მხოლოდ საკუთარ ტერიტორიაზე გამოეყენებინა, რომლის დაახლოებით ერთი მეხუთედი რუსეთის კონტროლის ქვეშაა.

რუსეთის თავდაცვის სამინისტრომ Telegram-ზე დაწერა: „რუსულმა S-400-ის საჰაერო თავდაცვის სისტემამ და „პანცირის“ სარაკეტო-საზარბაზნე კომპლექსებმა ყველა ATACMS-ის რაკეტა ჩამოაგდეს“.

სამინისტრომ დაამატა, რომ განადგურებული რაკეტების ნამსხვრევებმა ვორონეჟში მოხუცთა თავშესაფრისა და ბავშვთა სახლის სახურავები და ერთი საცხოვრებელი სახლი დააზიანა; სამოქალაქო პირებს შორის მსხვერპლი ან დაშავებულები არ არიან.

სამინისტრომ რაკეტების ნამსხვრევების ფოტოები გამოაქვეყნა და აღნიშნა, რომ საჰაერო დაზვერვამ ATACMS-ების გაშვების ადგილად ხარკოვის ოლქი დააფიქსირა.

რუსეთმა განაცხადა, რომ უკრაინის ორი ზალპური ცეცხლის რეაქტიული სისტემის გასანადგურებლად „ისკანდერ-M“-ის ტიპის რაკეტები გაუშვა.

უკრაინამ აშშ-ის წარმოებული ATACMS-ის რაკეტებით რუსეთის ტერიტორიას ადრეც, იანვარში შეუტია და რუსეთის ბელგოროდის ოლქს ექვსი რაკეტა ესროლა.

გასულ წელს, მას შემდეგ რაც უკრაინამ რუსეთს აშშ-ის ATACMS-ისა და ბრიტანული Storm Shadow-ს რაკეტები ესროლა, პუტინმა უკრაინის წინააღმდეგ ჰიპერბგერითი რაკეტის გაშვების ბრძანება გასცა.

რუსეთი უკრაინაზე თავდასხმებს აძლიერებს

ოლქის გუბერნატორმა ოლეგ სინეგუბოვმა განაცხადა, რომ ოთხშაბათს, ხარკოვზე რუსული უპილოტო საფრენი აპარატებით ღამით განხორციელებული თავდასხმის შედეგად, სულ მცირე 36 ადამიანი დაშავდა, მათ შორის ორი ბავშვი.

თერთმეტმა დრონმა სლობიდსკისა და ოსნოვიანსკის რაიონებს დაარტყა; ხანძარი გაჩნდა ცხრასართულიან შენობაში, დაზიანდა ავტომობილები, ავტოფარეხები და სუპერმარკეტი.

სამაშველო ჯგუფებმა 48 ადამიანის ევაკუაცია განახორციელეს. პოლიციის ცნობით, დაშავებულებს შორის ცხრა და 13 წლის ორი ბავშვია, რომლებსაც ექიმებმა „მწვავე სტრესული რეაქციის“ დიაგნოზი დაუსვეს.

მოსკოვი უკრაინის ენერგეტიკულ ინფრასტრუქტურაზე თავდასხმებს აძლიერებს; ეს ოქტომბრის შემდეგ გაზის ობიექტებზე განხორციელებულ ყველაზე მასშტაბურ დაბომბვად ფასდება.

უკრაინის პრეზიდენტი ვოლოდიმირ ზელენსკი, ზამთრის სეზონისა და ჩიხში შესული სამშვიდობო მოლაპარაკებების ფონზე, არმიის მხარდაჭერისა და კრიტიკული ინფრასტრუქტურის დაცვის მიზნით ევროპულ ტურნეს მართავს.

დაღლილი და რიცხობრივ უმცირესობაში მყოფი უკრაინული შენაერთები აღმოსავლეთის ფრონტის დაცვას განაგრძობენ, რუსულმა ძალებმა კი სამშაბათს ორი სოფელი დაიკავეს.