ადგილობრივი ხელისუფლება და მედია იტყობინება, რომ ლოს-ანჯელესში შაბათს, ავტომობილი ხალხში შევარდა, რის შედეგადაც სულ მცირე 30 ადამიანი დაშავდა, მათგან შვიდი მძიმე მდგომარეობაშია.

CNN-ი ლოს-ანჯელესის სახანძრო დეპარტამენტზე დაყრდნობით იუწყება, რომ შემთხვევა შაბათს, ადგილობრივი დროით დაახლოებით 2:00 საათზე, აღმოსავლეთ ჰოლივუდში, დასავლეთ სანტა მონიკას ბულვართან ახლოს მოხდა, რომელიც მუსიკალური სივრცეებითაა ცნობილი.

სახანძრო დეპარტამენტის ინფორმაციით, შვიდი ადამიანი კრიტიკულ მდგომარეობაში საავადმყოფოში გადაიყვანეს, ექვსი ადამიანი მძიმედ დაშავდა, ხოლო 19-მა საშუალო სიმძიმის დაზიანებები მიიღო.

სახანძრო სამსახურის ცნობით, აღმოსავლეთ ჰოლივუდში შემთხვევის ადგილზე 100-ზე მეტი მეხანძრე მუშაობდა.

ABC News-ი იტყობინება, რომ სახანძრო დეპარტამენტის წარმომადგენლის წინასწარი შეფასებით, მძღოლმა გონება დაკარგა და ღამის კლუბის წინ მდგარ ხალხში შევარდა.

თუმცა, ეს ინფორმაცია ჯერჯერობით გადამოწმებული არ არის.

ინციდენტის ადგილი ახლოსაა ჰოლივუდის ისეთ ღირსშესანიშნაობებთან, როგორიცაა სანსეტ ბულვარი და დიდების ხეივანი, რომელიც კინოს სამყაროს მნიშვნელოვანი ფიგურების სახელების ვარსკვლავებით არის მორთული.