აშშ-ის პრეზიდენტმა დონალდ ტრამპმა განაცხადა, რომ მისი ქვეყანა ისრაელისთვის განკუთვნილი 4 მილიარდი დოლარის დახმარებას შეაჩერებს.
Fox News-თან საუბრისას დონალდ ტრამპმა ისრაელისთვის განკუთვნილ 4 მილიარდი დოლარის დახმარებასთან დაკავშირებით განაცხადა: „ისრაელს ფულს აღარ მივცემთ“.
ტრამპის თქმით, უკვე მიღწეულია შეთანხმება, რომლის თანახმადაც ისრაელისთვის დახმარება წლის ბოლომდე შეწყდება. თუმცა მან აღნიშნა, რომ საჭიროების შემთხვევაში აშშ ისრაელს დახმარებას გაუწევს.
ტრამპის განცხადებით, ეს საკითხი ისრაელის პრემიერ-მინისტრმა ბენიამინ ნეთანიაჰუმ წამოჭრა. მან ასევე აღნიშნა, რომ ისრაელი განვითარებული ქვეყანაა და აღნიშნული დახმარება არ სჭირდება.
კითხვაზე, თუ რა ნაბიჯებს გადადგამს აშშ ირანთან დაკავშირებით შუალედური არჩევნების შემდეგ, ტრამპმა უპასუხა: „ჩემი მიზანი ბევრი ადამიანის დახოცვა არ არის, მაგრამ თუ იძულებული გავხდებით, ამის გაკეთება მოგვიწევს. თუმცა ეს ჩემი მიზანი არ არის“.
აშშ-ის პრეზიდენტმა ასევე განაცხადა: „თუ ამერიკაში ხალხს მოვბეზრდი, შემიძლია ისრაელში გადავიდე და იქ პრემიერ-მინისტრი გავხდე“.
ტრამპის თქმით, ისრაელში მის მიმართ საზოგადოებრივი მხარდაჭერა 99 პროცენტს შეადგენს. მან აღნიშნა, რომ ეს მხარდაჭერის ძალიან მაღალი მაჩვენებელია და მას ყველა ვერ მიაღწევს.
