პრეზიდენტმა რეჯეფ თაიფ ერდოღანმა აღნიშნა, რომ ისრაელის თავდასხმებმა სირიასა და ლიბანზე მიაღწია იმ წერტილს, სადაც ისინი საფრთხეს უქმნიან არა მხოლოდ ამ ორ ქვეყანას, არამედ უკვე თურქეთსაც. მან განაცხადა, რომ ისრაელის „აგრესია“ საფრთხეს წარმოადგენს მთელი მსოფლიოსთვის და ის უნდა შეჩერდეს.
ოთხშაბათს, მეჯლისში სამართლიანობის და განვითარების პარტიის (AKP) დეპუტატების წინაშე სიტყვით გამოსვლისას, ერდოღანმა ისრაელი დაადანაშაულა ისეთ მცდელობებში, რამაც შესაძლოა კიდევ უფრო მეტი დესტაბილიზაცია გამოიწვიოს აღმოსავლეთ ხმელთაშუაზღვისპირეთსა და უფრო ფართო რეგიონში.
„თურქეთის უსაფრთხოება მხოლოდ ჰათაიდან არ იწყება; ის იწყება ალეპოდან, იწყება დამასკოდან. თურქეთის უსაფრთხოება იწყება ბეირუთიდან. ჩვენ არ შევეგუებით არანაირ თავსმოხვეულ ფაქტს ჩვენი ძმების ქვეყნებში და თვალს არ დავხუჭავთ მათ წინააღმდეგ მიმართულ არცერთ თავდასხმაზე“, - განაცხადა პრეზიდენტმა და ხაზი გაუსვა, რომ ქვეყნის უსაფრთხოების საზღვრები მის ტერიტორიებს მიღმა ვრცელდება.
პრეზიდენტმა ერდოღანმა ასევე აღნიშნა, რომ თურქეთმა კარგად იცის, რა არის „აღთქმული მიწის“ ილუზიის საბოლოო მიზანი და დასძინა: „ღვთის ნებით, ამას არასოდეს დავუშვებთ“.
ერდოღანმა გააფრთხილა სხვა ქვეყნები, არ დადგნენ ისრაელის მხარეს: „არავინ გამოეკიდოს თავგადასავლებს. არავინ გაჰყვეს სიონისტური მკვლელობის ქსელის კვალს“.
ერდოღანმა გააფრთხილა, რომ თუ ისრაელის ქმედებები არ შეიზღუდება, ამას უფრო ფართო შედეგები მოჰყვება: „თუ ისრაელის თავგასულობა არ შეჩერდება, ამის საზღაურს რეგიონთან ერთად მთელი კაცობრიობა გადაიხდის. ისრაელი უნდა შეჩერდეს. ეს კაცობრიობისა და ჰუმანურობის ფრონტის ვალია. ისტორიის გამეორება არ უნდა დავუშვათ“.
პრეზიდენტმა ყველას მოუწოდა, რომ „არავინ გამოეკიდოს თავგადასავლებს“ და „არ ჩაჯდეს ისრაელის ინტრიგების ნავში“: „თუ აღმოსავლეთ ხმელთაშუაზღვისპირეთში თურქეთისა და კვიპროსელი თურქების უფლებებსა და კანონებს საფრთხე დაემუქრება, მსურს იცოდეთ, რომ ჩვენი პასუხი იქნება ძალიან მკაფიო და ძალიან მკაცრი“.
ერდოღანმა კიდევ ერთხელ გაუსვა ხაზი ისრაელის შეჩერების აუცილებლობას და აღნიშნა, რომ შემდგომი დაძაბულობის თავიდან აცილება კაცობრიობის საერთო საქმე გახდა, ხოლო ესკალაციის აღკვეთა მთელი კაცობრიობის პასუხისმგებლობაა.
