გავრცელებული ინფორმაციით, ირანის თავდასხმებმა ახლო აღმოსავლეთში მდებარე აშშ-ის სადაზვერვო ობიექტებსა და აღჭურვილობას მილიარდობით დოლარის ზიანი მიაყენა.
ტელეკომპანია NBC News-ის ინფორმაციით, რომელიც საკითხში ჩახედულ 4 ოფიციალურ პირს ეყრდნობა, ირანის უპილოტო საფრენი აპარატებისა (დრონების) და სარაკეტო დარტყმების შედეგად დაზიანდა გარკვეული შენობები და აღჭურვილობა, რომლებსაც ახლო აღმოსავლეთში აშშ-ის ცენტრალური სადაზვერვო სააგენტო (CIA) და სხვა სადაზვერვო სამსახურები იყენებდნენ.
ოფიციალური პირები აცხადებენ, რომ თავდასხმებმა რეგიონში აშშ-ის სადაზვერვო ობიექტებს „უპრეცედენტო“ მასშტაბის ზიანი მიაყენა, ხოლო შენობებისა და აღჭურვილობის შეკეთება ან განახლება მილიარდობით დოლარი დაჯდება.
CNN-ის ცნობით, რომელიც თანამგზავრულ ფოტოებს, ზიანის შეფასების ანგარიშებსა და აშშ-ისა და ყურის ქვეყნების წყაროებს ეყრდნობა, 28 თებერვლიდან მოყოლებული ირანის დარტყმების შედეგად ახლო აღმოსავლეთში აშშ-ის არმიის სულ მცირე 16 ბაზა სხვადასხვა ხარისხით დაზიანდა.
არაერთმა ამერიკულმა მედიასაშუალებამ, მათ შორის CBS News-მა და CNN-მა, ასევე გაავრცელა ინფორმაცია, რომ ირანთან ომის საერთო ღირებულება სულ მცირე 50 მილიარდ დოლარს შეადგენს.
