ირანელმა მაღალჩინოსანმა სააგენტო Reuters-ს განუცხადა, რომ აშშ-სთან მომზადებული ურთიერთგაგების მემორანდუმის საბოლოო პროექტი მოიცავს სხვადასხვა საკითხს — თეირანის ბირთვული პროგრამიდან დაწყებული, ჰორმუზის სრუტის გახსნითა და აშშ-ის ნავთობის სანქციებისგან გათავისუფლებით (შეღავათებით) დასრულებული.

ოფიციალური პირის განცხადებით, თუ ორივე მხარე დაამტკიცებს მემორანდუმის პროექტს, საბოლოო შეთანხმება 60 დღის განმავლობაში განიხილება.

პროექტი მოიცავს შემდეგ პუნქტებს:

ჰორმუზის სრუტე

ირანი დაუყოვნებლივ გახსნის ჰორმუზის სრუტეს ყველა კომერციული გემისთვის. აშშ კი მოხსნის საზღვაო ბლოკადას, რომელიც ირანის პორტებს ჰქონდა დაწესებული.

ფინანსური ზომები

აშშ თანახმაა, რომ საბოლოო შეთანხმების მიღწევამდე ირანს ახალი სანქციები არ დაუწესოს.

ვაშინგტონი ირანს განსაზღვრული ვადით ნავთობის სანქციებისგან გაათავისუფლებს. ამგვარად, თეირანი შეძლებს ნავთობის გაყიდვას და რეალიზაციიდან მიღებული შემოსავლის მიღებას.

აშშ ასევე თანახმაა ირანის 25 მილიარდი დოლარის ღირებულების გაყინული აქტივების გათავისუფლებაზე სხვადასხვა მეთოდით, მათ შორის: პირდაპირი ფულადი გზავნილებით, რეგიონის ქვეყნებს შორის თანამშრომლობითა და ფინანსური საკრედიტო ხაზებით.

ბირთვული საკითხები

თეირანი თანახმაა, არ აწარმოოს და არ მოიპოვოს ბირთვული იარაღი.

საბოლოო შეთანხმების მიღწევამდე ირანი შეინარჩუნებს არსებულ ბირთვულ სტატუს-კვოს, რაც გულისხმობს ურანის არგამდიდრებასა და ბირთვული ობიექტების არგაფართოებას.

აშშ თანახმაა, რომ თეირანმა მაღალგამდიდრებული ურანის მარაგი ირანის საზღვრებშივე გააზავოს. ამის განხორციელების მექანიზმი 60 დღის განმავლობაში განიხილება.