თურქული თავდაცვის ინდუსტრიის გიგანტმა Roketsan-მა ახალი თაობის მაღალი სიჩქარის მრავალფუნქციური „მოხეტიალე“ საბრძოლო მასალა EREN-ი პირველად საუდის არაბეთის დედაქალაქ რიადში გამართულ World Defense Show (WDS) 2026-ის გამოფენაზე გამოაჩინა.
თურქეთის წამყვანმა მწარმოებელმა საბრძოლო მასალების, რაკეტებისა და სარაკეტო სისტემების დარგში, 8-12 თებერვალს გამართულ გამოფენაზე პროდუქციის ფართო არჩევანი წარადგინა. გამოფენილ პროდუქტებს შორის იყო: მინი ჭკვიანი საბრძოლო მასალები MAM-C, MAM-L და MAM-T; ჰაერი-ხმელეთის ტიპის ბალისტიკური ზებგერითი რაკეტა İHA-230; მოკლე მანძილის ტანკსაწინააღმდეგო იარაღი Karaok; ფრთოსანი რაკეტა Çakır; საბრძოლო მასალა SOM; საჰაერო თავდაცვის სარაკეტო სისტემა Sungur; საჰაერო თავდაცვის რაკეტა Hisar-O და შორ მანძილზე მოქმედი საჰაერო და სარაკეტო თავდაცვის სისტემა Siper.
ასევე Roketsan-მა წარმოადგინა Bora, TRG-230 და TRG-300 რაკეტები, ტაქტიკური სარაკეტო გამშვები სისტემა KMC და მობილური საჰაერო თავდაცვის სისტემა Burç-ი.
მომზადდა ერთ წელზე ნაკლებ დროში
კომპანიის განცხადებით, ადგილობრივი წარმოების საბრძოლო მასალამ - EREN-მა, რომლის კონცეფციის ეტაპიდან ოპერაციულ პროდუქტად ჩამოყალიბებას ერთ წელზე ნაკლები დასჭირდა, გამოცდა მრავალფუნქციურ უპილოტო საბრძოლო თვითმფრინავ Bayraktar Akıncı-ზე გაიარა.
EREN-ი, რომლის სერიული წარმოებაც წელს იგეგმება, შექმნილია თურქეთის შეიარაღებული ძალებისა და მეგობარი/მოკავშირე ქვეყნების ოპერატიული საჭიროებების დასაკმაყოფილებლად.
EREN-ის ტექნიკური მახასიათებლები და შესაძლებლობები
EREN-ის გაშვება შესაძლებელია უპილოტო საფრენი აპარატებიდან (İHA), ვერტმფრენებიდან, სახმელეთო მანქანებიდან, სტაციონარული სახმელეთო სისტემებიდან და საზღვაო პლატფორმებიდან. საბრძოლო მასალის სხვა გამორჩეული მახასიათებლებია:
სამიზნეების მრავალფეროვნება: დაბალი სიჩქარის საჰაერო სამიზნეების, ასევე ჯავშანტექნიკისა და არაჯავშნიანი სახმელეთო სამიზნეების განადგურების შესაძლებლობა.
მოქმედების რადიუსი: Roketsan-ის მონაცემებით, ოპერატიული მანძილი 100 კილომეტრს აღემატება.
მართვა: მოწინავე მართვის შესაძლებლობები და ხელოვნური ინტელექტის მხარდაჭერა.
„ახალი ოპერატიული სეგმენტი“
EREN-თან დაკავშირებით, Roketsan-ის გენერალურმა დირექტორმა მურათ იქინჯიმ განაცხადა: „ჩვენი მიზანი იყო შეგვექმნა ეკონომიურად მომგებიანი საბრძოლო მასალა, რომელიც ეფექტური იქნებოდა ჰაერი-ხმელეთის, ხმელეთი-ხმელეთისა და ხმელეთი-ჰაერის ტიპის სამიზნეების წინააღმდეგ“. გენერალურმა დირექტორმა დაამატა, რომ EREN-ი მნიშვნელოვნად გაზრდის უპილოტო საფრენი აპარატების დარტყმის ძალას და უზრუნველყოფს მაღალეფექტურ გასროლებს სახმელეთო პლატფორმებიდან, მათ შორის ავტონომიური სისტემებიდან და ჯავშანტექნიკიდან.
იქინჯიმ აღნიშნა, რომ საბრძოლო მასალის შემადგენლობაში არსებული ხელოვნური ინტელექტის ალგორითმები, ფრენის მართვის მოწინავე სენსორები და ტურბორეაქტიული ძრავა ხსნის ახალ ოპერატიულ შესაძლებლობებს. მისივე თქმით, გრძელდება მუშაობა სისტემის ინტეგრაციაზე უპილოტო სახმელეთო საშუალებებზე, დაჯავშნულ პლატფორმებსა და ახლო საჰაერო თავდაცვის სისტემებზე, ხოლო მომავალში შესაძლებელია მისი თვითმფრინავებთან ინტეგრირებაც.
