ვაშინგტონში პოლიტიკურად დისკრედიტირებული, ილონ მასკის გავლენა X-ის პლატფორმაზე, რომელსაც ყველაზე მეტი გამომწერი ჰყავს, კვლავაც გრძელდება.
მასკი, რომელიც თავისი პოლიტიკური პარტიის შექმნას ცდილობს, ამ პლატფორმაზე ფართო აუდიტორიაზე წვდომის ძალას იყენებს ევროპაში მემარჯვენე პოლიტიკოსებთან და აქტივისტებთან კავშირების გასაძლიერებლად.
Associated Press-ის მიერ საჯარო მონაცემებზე დაყრდნობით ჩატარებულმა ანალიზმა აჩვენა, რომ ეს ურთიერთობები ევროპაში ახალი შეშფოთების წყაროს ქმნის. ამჯერად საქმე გვაქვს არა რუსეთიდან ან ჩინეთიდან, არამედ ამერიკის შეერთებული შტატებიდან მომდინარე საგარეო ჩარევის შფოთვასთან.
Associated Press-ის კვლევაში გაანალიზებულია 20 000-ზე მეტი პოსტი, რომელიც შეგროვებულია Bright Data-ს მიერ. სამწლიანი პერიოდის მონაცემები მოიცავს 11 ევროპელი ფიგურის პოსტების ნიმუშს, რომლებიც რეგულარულად უჭერენ მხარს მემარჯვენე პოლიტიკურ ან სოციალურ დღის წესრიგებს და აქვთ მნიშვნელოვანი ურთიერთობები მასკთან.
რეტვიტების თამაში
ილონ მასკმა X-ის პლატფორმაზე უნიკალური გავლენის სფერო შექმნა მისი 2022 წლის ოქტომბერში შეძენის შემდეგ. მასკის გამომწერების რაოდენობამ 220 მილიონს გადააჭარბა, რაც ორჯერ მეტია და ამ ზრდის ტემპით მან ყველა სხვა დიდ ანგარიშს გადაუსწრო.
მასკის მიერ მხარდაჭერილი ანგარიშები გლობალური მასშტაბით აღმავალი ნაციონალისტური ალიანსის ნაწილს ქმნის, რომლებიც გაერთიანებულნი არიან საერთო მიზნებით, როგორიცაა იმიგრაციის შეჩერება, პროგრესული პოლიტიკის შეცვლა და გამოხატვის აბსოლუტური თავისუფლების ხედვის გავრცელება.
Associated Press-ის მიერ გაანალიზებულ ანგარიშებს შორის არიან ისეთი პირებიც, რომლებიც თავიანთ ქვეყნებში უკანონო საქმიანობაში არიან ბრალდებულნი.
ინგლისში, ანტი-საიმიგრაციო აქტივისტს, ტომი რობინსონს, ოქტომბერში 18 თვით თავისუფლების აღკვეთა მიესაჯა სირიელი ლტოლვილის შესახებ ცილისმწამებლური ბრალდებების გავრცელებისთვის სასამართლოს გადაწყვეტილების დარღვევის გამო.
გერმანიის მემარჯვენე პარტია AfD-ის პოლიტიკოსი ბიორნ ჰიოკე გასულ წელს ნაცისტური ლოზუნგის შეგნებულად გამოყენებისთვის გაასამართლეს.
იტალიის ვიცე-პრემიერი მატეო სალვინი დეკემბერში გაამართლეს ჰუმანიტარული დახმარების გემზე 100 მიგრანტის უკანონოდ დაკავების ბრალდებებში.
მასკის მიერ წამოწეული სხვა პირები არიან:
ალის ვაიდელი: გერმანიის AfD პარტიის თანათავმჯდომარე; მან პარტია ამ წელს საუკეთესო საარჩევნო შედეგამდე მიიყვანა.
ევა ვლაარდინგერბრუკი: ჰოლანდიელი სოციალური მედიის ფენომენი, რომელიც ცნობილია როგორც "მემარჯვენეების ფარი".
ნაომი ზეიბტი: გერმანელი აქტივისტი, რომელიც ცნობილია როგორც "ანტი-გრეტა თუნბერგი"; ამჟამად პოლიტიკურ დევნილობაში ცხოვრობს ვაშინგტონში.
რუბენ პულიდო და ფორო მადრიდი: ორივე დაკავშირებულია ესპანეთის მემარჯვენე პარტია Vox-თან.
ფიდიას პანაიოტუ: პოლიტიკოსი სამხრეთ კვიპროსის ბერძნული მმართველობიდან; გამოირჩეოდა მასკის კომპანიების მხარდაჭერით.
ამ ანგარიშებმა მასკის მიერ Twitter-ის (ახლანდელი X) შეძენიდან 2022 წლის ოქტომბერში მიმდინარე წლის იანვრამდე დაახლოებით 5 მილიონი ახალი გამომწერი შეიძინეს.
