ირანის საგარეო საქმეთა მინისტრმა აბას არაღჩიმ განაცხადა, რომ ლიბანში ცეცხლის შეწყვეტის შეთანხმების შესაბამისად, ჰორმუზის სრუტეში ყველა კომერციული გემის ტრანზიტი ცეცხლის შეწყვეტის დარჩენილი პერიოდის განმავლობაში სრულად ღიაა.

პარასკევს X-ზე გამოქვეყნებულ პოსტში აბას არაღჩიმ აღნიშნა: „ლიბანში ცეცხლის შეწყვეტის პარალელურად, ირანის პორტებისა და ნაოსნობის ორგანიზაციის მიერ უკვე გამოცხადებული კოორდინირებული მარშრუტის მეშვეობით, ყველა კომერციული გემის გავლა ჰორმუზის სრუტეში ცეცხლის შეწყვეტის დარჩენილი პერიოდის განმავლობაში სრულად ღიად გამოცხადდა“.

აშშ-ის პრეზიდენტი დონალდ ტრამპი მიესალმა ირანის ამ განცხადებას

ტრამპმა Truth Social-ის პლატფორმაზე დაწერა: „გმადლობთ!“, და აღნიშნა ირანის განცხადება იმის შესახებ, რომ ეს ვიწრო წყლის გზა „სრულად ღია და მზად არის სრული ტრანზიტისთვის“.

თუმცა, ტრამპმა დასძინა, რომ ვიდრე თეირანთან სამშვიდობო შეთანხმება არ გაფორმდება, აშშ-ის მიერ ირანის პორტებისთვის დაწესებული საზღვაო ბლოკადა გაგრძელდება.

მას შემდეგ, რაც 28 თებერვალს ირანზე აშშ-ისრაელის თავდასხმები დაიწყო, სრუტეში გემების მოძრაობა უკიდურესად იშვიათია; ყოველდღიური ტრანზიტების რაოდენობა, შაბათ-კვირას დაფიქსირებული ხანმოკლე მატების გარდა, ძირითადად ერთნიშნა ციფრებში რჩებოდა.

აშშ-ის სამხედრო-საზღვაო ძალების მიერ გამოცხადებული ბოლო წესის თანახმად, გემთმფლობელებს ყურედან ნავთობისა და სხვა საქონლის გასატანად ნებართვა როგორც ირანის, ისე ამერიკის ოფიციალური პირებისგან სჭირდებათ. ეს კი ტვირთბრუნვაზე გაურკვევლობას კიდევ უფრო ზრდის.

მიუხედავად იმისა, რომ გასულ კვირას სამმა სუპერტანკერმა, რომლებსაც არაირანული ნედლი ნავთობი გადაჰქონდათ, სრუტიდან გასვლა მოახერხა, ბლოკადის დაწესებამდეც კი, ბოლო შვიდი კვირის განმავლობაში სრუტე ძალიან ცოტა ტანკერმა გადაკვეთა.

პაკისტანის დროშის ქვეშ მცურავი ტანკერი „შალამარის“ ყურეში შესვლას პირველად კვირას შეეცადა, თუმცა აშშ-ირანის სამშვიდობო მოლაპარაკებების ჩაშლის შემდეგ უკან გაბრუნდა. მოგვიანებით ტანკერმა ტრანზიტი დაასრულა, კუნძულ დასისკენ გაემართა, იქ ნედლი ნავთობით დაიტვირთა და ხუთშაბათს აღმოსავლეთისკენ აიღო გეზი.

აშშ-ის ცენტრალურმა სარდლობამ (CENTCOM) ხუთშაბათს განაცხადა, რომ ბოლო სამ დღეში 14 გემი უკან გაბრუნდა და აღნიშნა, რომ ბევრი გემთმფლობელი არსებულ პირობებში სრუტის გადაკვეთის რისკზე წასვლას არ ისურვებს.

ვრცელდება ინფორმაცია, რომ ბლოკადა ომანის სანაპიროებთან მდებარე რას-ელ-ჰადის მახლობლობიდან ირან-პაკისტანის საზღვრამდე ვრცელდება.