თურქეთის რესპუბლიკის ჯანდაცვის სამინისტროს ოფიციალურმა პირებმა პარასკევს გაკეთებულ განცხადებაში აღნიშნეს, რომ ქვეყანამ წარმატებით დაასრულა პირველი კლინიკური ოპერაცია, რომელშიც გამოყენებული იყო ჯანდაცვის სამინისტროსა და თურქული თავდაცვის გიგანტის, ASELSAN-ის მიერ ერთობლივად შემუშავებული პირველი ადგილობრივი გულ-ფილტვის აპარატი.
თურქეთის რესპუბლიკის ჯანდაცვის სამინისტრომ სოციალურ ქსელ X-ზე გამოქვეყნებულ განცხადებაში ეს ოპერაცია „თურქეთის ჯანდაცვის ინდუსტრიის ერთ-ერთ გარდამტეხ მომენტად“ შეაფასა. სამინისტრომ აღნიშნა, რომ ეს არის „სიცოცხლის გადამრჩენელი დიდი ნაბიჯი“ და დაამატა, რომ პაციენტი ოპერაციის შემდეგ გამოჯანმრთელდა.
თურქეთის რესპუბლიკის თავდაცვის მრეწველობის სამმართველოს ხელმძღვანელმა, ჰალუქ გორგუნმა ხაზგასმით აღნიშნა, რომ აპარატმა LIFELINE HLM-მა, რომელმაც ოპერაციის განმავლობაში უსაფრთხოდ უზრუნველყო პაციენტის სისხლის მიმოქცევა და ჟანგბადით მომარაგება, შესაძლებელი გახადა ოპერაციის წარმატებით დასრულება. მან განაცხადა: „ის ფაქტი, რომ ამ კრიტიკულ მოწყობილობას, რომელსაც წლების განმავლობაში საზღვარგარეთიდან ვიძენდით, უკვე საკუთარი რესურსებით ვაწარმოებთ, ჩვენი ტექნოლოგიური დამოუკიდებლობისთვის ძვირფასი მონაპოვარია“.
გორგუნმა სისტემას „საინჟინრო საოცრება“ უწოდა და აღნიშნა, რომ ოპერაციის დროს ამ აპარატმა პირველად „იმუშავა გულის ნაცვლად“ (სიტყვასიტყვით: „გულის ნაცვლად ფეთქავდა“).
ეს მოწყობილობა განიხილება, როგორც თურქეთის მცდელობის გამოხატულება - თავდაცვის სექტორში დაგროვილი საინჟინრო გამოცდილება ისეთ სამოქალაქო სფეროებში გადაიტანოს, როგორიცაა ჯანდაცვა.
