რუსეთის პრეზიდენტმა ვლადიმერ პუტინმა განაცხადა, რომ მის ქვეყანასა და უკრაინას შორის შეთანხმება უნდა შედგეს და ამისთვის შანსი არსებობს: „საბოლოო ჯამში, პრობლემა კონფლიქტის მხარეებს შორის უნდა გადაწყდეს“.

ვლადიმერ პუტინი ქალაქ ვლადივოსტოკში გამართული მე-11 აღმოსავლეთის ეკონომიკური ფორუმის პლენარულ სესიას დაესწრო.

ფორუმზე სიტყვით გამოსვლისას პუტინმა ყურადღება გაამახვილა იმაზე, რომ აშშ, უკრაინის კრიზისის მოგვარების შემდეგ, რუსეთთან ურთიერთობებზე გააკეთებს აქცენტს და აღნიშნა:

„რუსეთმა და უკრაინამ ერთმანეთში უნდა მიაღწიონ შეთანხმებას. სხვა ქვეყნები კი, მათ შორის აშშ და ჩინეთი, მზად არიან მხარი დაუჭირონ ამ პროცესს. საბოლოო ჯამში, საკითხი კონფლიქტის მხარეებს შორის უნდა მოგვარდეს. ეს მხარეები კი რუსეთი და უკრაინაა. გვჯერა, რომ ეს სწორი მიდგომაა. მადლობას ვუხდით ყველას, ვინც ამ საკითხის მოგვარებაში წვლილის შეტანას ცდილობს. მაშ, არსებობს თუ არა მოგვარების შანსი? ვფიქრობ, არსებობს“.

პუტინმა მიუთითა უკრაინის პრეზიდენტის, ვოლოდიმირ ზელენსკის მიერ რუსეთის სამოქალაქო ავიაციის მიმართ გაჟღერებულ მუქარაზე და შეაფასა: „ეს სახელმწიფო ტერორიზმის გამოვლინებაა. ეს ართულებს სამშვიდობო მოლაპარაკებების წარმოების შესაძლებლობებს. უკრაინის დასავლელი მოკავშირეები, რომლებიც ამაზე დუმან, საერთაშორისო ტერორიზმის თანამონაწილეები ხდებიან“.

ვლადიმერ პუტინმა ასევე აღნიშნა, რომ უკრაინულ მხარესთან კონტაქტები სპეცსამსახურების მეშვეობით გრძელდება.

რუსეთის ლიდერმა ქვეყანაში არსებულ საწვავის პრობლემასთან დაკავშირებით განაცხადა: „ყველაფრისთვის მზად უნდა ვიყოთ“.

გაიხსენა რა გერმანიის გადაწყვეტილება ბონში რუსეთის გენერალური საკონსულოს დახურვის შესახებ — იმ მოტივით, რომ გასულ თვეს ლაიფციგ-ჰალეს აეროპორტში ასაფეთქებელი ნივთიერებით დატვირთული უპილოტო საფრენი აპარატი აღმოაჩინეს — პუტინმა თქვა: „თავისი ფობიების გამო გერმანიამ რუსეთის და გერმანიის მოქალაქეებს საკონსულო და კულტურულ მომსახურებაზე წვდომა წაართვა. ჩვენი საელჩო ბერლინში საკუთარ თავზე აიღებს ვიზების, პასპორტებისა და სანოტარო პროცედურების მომსახურებას“.