Wall Street Journal-ის ოთხშაბათს გამოქვეყნებული ინფორმაციის თანახმად, აშშ-ის პრეზიდენტი დონალდ ტრამპი პირად საუბრებში ირანთან ომის დასრულებულად გამოცხადებას განიხილავს, მაშინ როცა პენტაგონი ახლო აღმოსავლეთში ჯარების დისლოკაციის ვადას ჩუმად ახანგრძლივებს.
გამოცემა წერს, რომ ტრამპმა თავის მაღალჩინოსან თანაშემწეებთან განიხილა საკითხი „უნდა დასრულდეს თუ არა ირანის ომი“, და გავრცელებული ცნობით, ეს პრეზიდენტის „არჩევანია“. ტრამპს სჯერა, რომ ინტენსიური ეკონომიკური ზეწოლის გაგრძელება თეირანს საბოლოოდ აიძულებს „ან დაშალოს თავისი ბირთვული პროგრამა, ან კოლაფსამდე მივიდეს“.
გასულ კვირას აშშ-მა დაიწყო ოპერაცია „Economic Outcast“, რომელიც მიზანში იღებს ირანის საკვანძო ეკონომიკურ არტერიებს, მათ შორის ნავთობის, საზღვაო გადაზიდვების, ავიაციის, ოქროს, ტექნოლოგიებისა და ციფრული აქტივების სექტორებს.
ფარული მოლაპარაკებების მიუხედავად, პენტაგონი დისლოკაციის ვადას ახანგრძლივებს, რაც იმის ნიშანია, რომ ომი შესაძლოა „მომავალი წლის მიწურულამდეც“ გაგრძელდეს.
პრეზიდენტისთვის ოპერატიული „მოქნილობის“ უზრუნველსაყოფად, შეიარაღებული ძალები რეგიონში 50 000 სამხედროსა და 19 სამხედრო ხომალდის, მათ შორის ორი ავიამზიდისა და 13 მართვადი სარაკეტო გამანადგურებლის განთავსებას განაგრძობს.
