ფედერალურმა სააპელაციო სასამართლომ პრეზიდენტ დონალდ ტრამპს საგანგებო უფლებამოსილების შესახებ კანონის შესაბამისად გადასახადების აკრეფის გაგრძელების უფლება მისცა, მაშინ როდესაც მისი ადმინისტრაცია ასაჩივრებს გადაწყვეტილებას, რომელმაც გააუქმა ტრამპის ეკონომიკური პოლიტიკის უმეტესი ნაწილი.
ხუთშაბათს, ფედერალური ოლქის სააპელაციო სასამართლომ დააკმაყოფილა ტრამპის ადმინისტრაციის გადაუდებელი მოთხოვნა, რომელშიც ნათქვამია, რომ საბაჟო გადასახადების შეჩერება "კრიტიკულად მნიშვნელოვანია ქვეყნის ეროვნული უსაფრთხოებისთვის".
სააპელაციო სასამართლომ დროებით შეაჩერა ფედერალური სავაჭრო სასამართლოს მიერ ერთი დღით ადრე გამოცემული ბრძანება.
სააპელაციო სასამართლოს არ დაუფიქსირებია რაიმე მოსაზრება ან დასაბუთება, თუმცა საქმეში მოსარჩელეებს 5 ივნისამდე, ხოლო ადმინისტრაციას 9 ივნისამდე პასუხის გაცემა დაავალა.
ტრამპის წინააღმდეგ მრავალი სარჩელი შევიდა იმის გამო, რომ "გათავისუფლების დღის" საბაჟო გადასახადები მის უფლებამოსილებას აღემატებოდა და ქვეყნის სავაჭრო პოლიტიკას მის პირად სურვილებზე დამოკიდებულს ხდიდა.
სამართლებრივი დავა
საერთაშორისო სავაჭრო სასამართლომ ოთხშაბათს დაადგინა, რომ ტრამპს არ ჰქონდა უფლებამოსილება საერთაშორისო საგანგებო ეკონომიკური უფლებამოსილების აქტის ფარგლებში ფართო ტარიფების დაწესებისთვის.
ტრამპის ადმინისტრაციამ გადაწყვეტილება სწრაფად გაასაჩივრა და წამოიწყო იურიდიული ბრძოლა ეკონომიკის საკვანძო პოლიტიკაზე, რომლის მიხედვითაც ტრამპმა განაცხადა, რომ ამერიკის ეკონომიკას ხელახლა წარმოებაზე კონცენტრირებულს გახდიდა, თუმცა კრიტიკოსები აფრთხილებდნენ, რომ ამან შესაძლოა გაზარდოს ხარჯები მცირე ბიზნესებისა და მომხმარებლებისთვის.
ხუთშაბათს შუადღეს, თეთრი სახლის პრეს-მდივანმა კაროლინ ლევიტმა გააკრიტიკა CIT-ის გადაწყვეტილება და სამი მოსამართლისგან შემდგარი პანელი, რომელშიც ტრამპის მიერ პირველ ვადაზე დანიშნული მოსამართლეც შედიოდა, „აქტივისტ მოსამართლეებად“ მოიხსენია.
ლევიტმა ასევე დასძინა, რომ გადაწყვეტილება „აშშ-ის სანდოობას მსოფლიო ასპარეზზე შერყევის საფრთხეს უქმნის“.
