ოთხშაბათს თურქეთის თავდაცვის სამინისტროს წარმომადგენლებმა განაცხადეს, რომ ნატოს საჰაერო თავდაცვამ თურქეთისკენ მიმართული ირანული წარმოშობის ბალისტიკური რაკეტა დააფიქსირა და ჩამოაგდო.
რაკეტა ერაყისა და სირიის ტერიტორიების გავლის შემდეგ, თურქეთის საჰაერო სივრცის გარეთ იქნა განადგურებული.
თურქეთის თავდაცვის სამინისტრომ განმარტა, რომ საფრთხის ჰაერში გასანადგურებლად გამოყენებული გადამჭერი რაკეტის ნამსხვრევი ჰათაის პროვინციაში, დიორთიოლის რაიონში ჩამოვარდა.
ინფორმაცია მსხვერპლის ან დაშავებულების შესახებ არ გავრცელებულა.
ანკარამ აღნიშნა, რომ ეროვნული უსაფრთხოების დაცვის ნება და შესაძლებლობები უმაღლეს დონეზეა. ხაზგასმით ითქვა, რომ თურქეთი მხარს უჭერს რეგიონულ სტაბილურობასა და მშვიდობას, თუმცა ამავე დროს გააჩნია სრული კომპეტენცია, დაიცვას საკუთარი ტერიტორია და მოქალაქეები ნებისმიერი სახის საფრთხისგან.
ოფიციალურმა პირებმა გააფრთხილეს მხარეები, რომ ნებისმიერ მტრულ ქმედებას ადეკვატური პასუხი გაეცემა და მოუწოდეს ყველას, თავი შეიკავონ ისეთი ნაბიჯებისგან, რამაც შეიძლება კონფლიქტის კიდევ უფრო მეტად გაფართოება გამოიწვიოს.
თურქეთმა ასევე დაამატა, რომ გააგრძელებს კონსულტაციებს ნატოსა და მოკავშირე პარტნიორებთან.
„კიდევ ერთხელ ვიმეორებთ ჩვენს გაფრთხილებას ყველა მხარის მიმართ, რომ თავი შეიკავონ იმ ნაბიჯებისგან, რამაც შეიძლება გაზარდოს დაძაბულობა რეგიონში და გამოიწვიოს კონფლიქტის უფრო ფართო ტერიტორიაზე გავრცელება“, - განაცხადა თურქეთის პრეზიდენტის ადმინისტრაციის კომუნიკაციების დირექტორატის ხელმძღვანელმა ბურჰანეთინ დურანმა.
მან ასევე მოუწოდა სოციალური ქსელების მომხმარებლებს, არ გაავრცელონ გადაუმოწმებელი ინფორმაცია.
