ირანი პარასკევს რომში დიდ ბრიტანეთთან, საფრანგეთთან და გერმანიასთან ბირთვულ მოლაპარაკებებს გამართავს. ირანის საგარეო საქმეთა მინისტრის მოადგილემ, აბას არაქჩიმ, ოთხშაბათს გაკეთებულ განცხადებაში აღნიშნა, რომ ეს მოლაპარაკებები თეირანსა და ვაშინგტონს შორის კრიტიკული ბირთვული მოლაპარაკებების დროს დაძაბული ურთიერთობების გაუმჯობესებას ისახავს მიზნად.
დაგეგმილი შეხვედრა კვირის ბოლოს იტალიაში გასამართ ირანსა და აშშ-ს შორის ბირთვული მოლაპარაკებების მეოთხე რაუნდამდე გაიმართება.
არაქჩიმ ირანულ მედიასთან საუბრისას თქვა: „ჩემი აზრით, სამმა ევროპულმა ქვეყანამ მათ მიერ გატარებული არასწორი პოლიტიკის გამო (ბირთვულ საკითხში) თავისი როლი დაკარგა. რა თქმა უნდა, ჩვენ ეს არ გვსურს და მზად ვართ რომში მათთან შესახვედრად.“
Reuters-მა ორშაბათს გაავრცელა ინფორმაცია, რომ თეირანმა E3-ის სახელით ცნობილ ევროპულ ქვეყნებთან - 2015 წლის ირანის ბირთვული შეთანხმების იმ მხარეებთან, რომლიდანაც აშშ-ის პრეზიდენტი დონალდ ტრამპი 2018 წელს, მისი პირველი საპრეზიდენტო ვადის დროს, გავიდა - შეხვედრის გამართვა შესთავაზა.
E3 ქვეყნების პოლიტიკურმა წარმომადგენლებმა დაადასტურეს, რომ პარასკევს ირანთან შეხვედრას გამართავენ. ტრამპი იმუქრებოდა თავდასხმით იმ შემთხვევაში, თუ ირანი ახალ ბირთვულ შეთანხმებას არ დათანხმდებოდა. ირანმა, მას შემდეგ, რაც აშშ შეთანხმებიდან გავიდა, მნიშვნელოვნად გადააჭარბა 2015 წლის შეთანხმებით მის ბირთვულ პროგრამაზე დაწესებულ ლიმიტებს. ევროპული ქვეყნები ვაშინგტონის მსგავს შეშფოთებას იზიარებენ იმის თაობაზე, რომ თეირანმა შესაძლოა ატომური ბომბი შექმნას.
ირანი აცხადებს, რომ მისი პროგრამა მშვიდობიანია. გაეროს უშიშროების საბჭოს რეზოლუციას, რომელმაც 2015 წლის შეთანხმება დაამტკიცა, ვადა ოქტომბერში ეწურება. საფრანგეთის საგარეო საქმეთა მინისტრმა სამშაბათს გაკეთებულ განცხადებაში თქვა, რომ თუ მოლაპარაკებები შეთანხმებით არ დასრულდება, ისინი საერთაშორისო სანქციების ხელახლა დაწესებაზე უარს არ იტყვიან.
საფრანგეთის მინისტრმა ჟან-ნოელ ბარომ თქვა: „ეს სანქციები ირანის წვდომას ტექნოლოგიებზე, ინვესტიციებსა და ევროპულ ბაზარზე სამუდამოდ შეწყვეტს და ქვეყნის ეკონომიკაზე დამანგრეველ გავლენას მოახდენს.“ ირანის წარმომადგენელმა გაეროში კი ასე უპასუხა: „თუ საფრანგეთი და მისი პარტნიორები ნამდვილად ეძებენ დიპლომატიურ გადაწყვეტას, ჩვენს მიმართ მუქარა უნდა შეწყვიტონ.“
აშშ-ის ხაზინის დეპარტამენტმა სამშაბათს ახალი სანქციები დაუწესა ირანულ და ჩინურ კომპანიათა ჯგუფს, რომლებსაც ირანის ისლამური რევოლუციის გუშაგთა კორპუსისთვის ბალისტიკური რაკეტების საწვავის კომპონენტების მიწოდებაში ედებათ ბრალი. არაქჩიმ თქვა, რომ მოლაპარაკებების დროს აშშ-ის მიერ დაწესებული სანქციები „არასწორ მესიჯს“ აგზავნის. ტრამპმა განაცხადა, რომ ის დარწმუნებულია ახალი შეთანხმების დადებაში, რომელიც ირანს ბირთვული ბომბის შექმნის გზას გადაუკეტავს.
