ისრაელის თავდაცვის მინისტრმა ისრაელ კაცმა სამშაბათს განაცხადა, რომ საჰაერო თავდასხმის შედეგად ირანის უსაფრთხოების მაღალჩინოსანი ალი ლარიჯანი მოკლეს.

მისი ოფისის მიერ გავრცელებულ განცხადებაში კაცი ამტკიცებს, რომ ლარიჯანი და „ბასიჯის“ ძალების სარდალი ღოლამ-რეზა სულეიმანი ღამის თავდასხმებისას „ნეიტრალიზებულნი“ იქნენ.

სამინისტროს მიერ გამოქვეყნებულ განცხადებაში კაცი აღნიშნავს: „ახლახან მივიღე ინფორმაცია გენერალური შტაბის უფროსისგან, რომ ლარიჯანი - ეროვნული უსაფრთხოების უმაღლესი საბჭოს გენერალური მდივანი - და სულეიმანი - ირანის ცენტრალური რეპრესიული აპარატის, „ბასიჯის“ ხელმძღვანელი - წუხელ ნეიტრალიზებულნი იქნენ“.

ისრაელის მედია მანამდე იუწყებოდა, რომ ლარიჯანი, როგორც ირანის ეროვნული უსაფრთხოების უმაღლესი საბჭოს ხელმძღვანელი, ისრაელის მიერ განხორციელებული ღამის თავდასხმების სამიზნე იყო.

ირანელი მაღალჩინოსნებისგან ამ ბრალდებაზე პასუხი ჯერ არ გაცემულა.

თუმცა, ისრაელის მტკიცების შემდეგ, ირანის სახელმწიფო მედიამ გამოაქვეყნა ხელნაწერი ჩანაწერი, რომელიც, მათი თქმით, ლარიჯანს ეკუთვნის.

ლარიჯანის X ანგარიშზე ბოლო პოსტი სამშაბათს, 17 მარტს, გრინვიჩით 09:40 საათზე გამოქვეყნდა. ეს იყო ხელნაწერი ჩანაწერი, რომელიც ირანის სამხედრო-საზღვაო ფლოტის დაღუპული წევრების დაკრძალვის ცერემონიასთან დაკავშირებით მათ ხსოვნას მიეძღვნა.

თუ მისი სიკვდილი დადასტურდა, ლარიჯანი იქნება ყველაზე მაღალი რანგის ირანელი მაღალჩინოსანი, რომელიც უზენაესი ლიდერის, ალი ხამენეის შემდეგ მოკლეს.

ლარიჯანი, ბირთვული საკითხების ყოფილი მომლაპარაკებელი და ხამენეის ახლო მოკავშირე, პარასკევს თეირანში „ყუდსის დღის“ ღონისძიებებზე ნახეს.

იმავე დღეს აშშ-მა 10 მილიონ დოლარამდე ჯილდო შესთავაზა მათ, ვინც მიაწვდიდა ინფორმაციას ირანის არმიისა და დაზვერვის მაღალჩინოსნებზე. სიაში 10 პირი იყო, მათ შორის ლარიჯანი, რომლებიც ირანის „ისლამური რევოლუციის გუშაგთა კორპუსთან“ არიან დაკავშირებულნი.