პრეზიდენტმა დონალდ ტრამპმა განაცხადა, რომ კონსტიტუციური შეზღუდვის მიუხედავად, მესამე ვადით პრეზიდენტად ყოფნის გზებს იკვლევს.
პრეზიდენტმა დონალდ ტრამპმა კვირას გაკეთებულ განცხადებაში თქვა, რომ მესამე ვადით პრეზიდენტობისთვის გზებს ეძებს და რომ ეს ხუმრობა არ არის. ეს იყო ყველაზე აშკარა სიგნალი კონსტიტუციური ბარიერის გადალახვისკენ, რათა მან თანამდებობაზე დარჩენა შეძლოს მისი მეორე ვადის 2029 წელს დასრულების შემდეგ.
„ამის გაკეთების გარკვეული მეთოდები არსებობს,“ – თქვა ტრამპმა NBC News-თან სატელეფონო ინტერვიუში საკითხზე საუბრისას.
თუმცა, მან დაამატა: „ამის განხილვა ჯერ ძალიან ადრეა“.
1951 წელს კონსტიტუციაში შეტანილი 22-ე შესწორება შეიცავს დებულებას: „არავინ შეიძლება პრეზიდენტად ორ ვადაზე მეტჯერ იქნეს არჩეული“. ეს მუხლი პრეზიდენტ ფრანკლინ დ. რუზველტის ზედიზედ ოთხჯერ არჩევის შემდეგ იქნა შემოღებული.
NBC-ის რეპორტიორმა კრისტენ უელკერმა ტრამპს ჰკითხა, ხომ არ იყო ერთ-ერთი შესაძლო სტრატეგია ვიცე-პრეზიდენტ ჯ.დ. ვენსის კანდიდატურის წარდგენა და არჩევის შემდეგ მისთვის თანამდებობის გადაცემა.
„ეს ერთი მეთოდია“, – უპასუხა ტრამპმა, – „მაგრამ სხვა გზებიც არსებობს. სხვა გზებიც არსებობს“, – დაამატა მან.
როდესაც უელკერმა ჰკითხა: „შეგიძლიათ სხვა გზა დამისახელოთ“?, ტრამპმა უპასუხა: „არა.“
ტრამპს ადრეც დროდადრო ჰქონდა გაკეთებული იუმორისტული განცხადებები მესამე ვადით პრეზიდენტობაზე.
იანვარში მან ეს საკითხი წამოჭრა კითხვით: „ნებადართულია თუ არა ხელახლა კენჭისყრა“?
