აშშ-ის საზედამხედველო ორგანიზაციაში შესული 200-ზე მეტი საჩივრის მიხედვით, ამერიკელი მეთაურები არმიის ყველა ქვედანაყოფის ჯარისკაცებს ეუბნებიან, რომ აშშ-ისა და ისრაელის ომი ირანის წინააღმდეგ მიზნად ისახავს ბიბლიური აპოკალიფსის ან არმაგედონის დაწყებას.
სამხედრო რელიგიური თავისუფლების ფონდისთვის (MRFF) ელექტრონული ფოსტით გაგზავნილ საჩივარში ერთ-ერთი სერჟანტი წერს: „ამ დილით ჩვენმა მეთაურმა საბრძოლო მზადყოფნის ბრიფინგი იმით დაიწყო, რომ არ უნდა შეგვშინებოდა იმის, რაც ახლა ირანში მიმდინარეობს. მან მოგვთხოვა, ჩვენი ჯარისკაცებისთვის გვეთქვა, რომ ეს „ღვთიური გეგმის ნაწილია“ და მოეყვანა მრავალი ციტატა „იოანეს გამოცხადებიდან“, რომელიც კონკრეტულად არმაგედონსა და ქრისტეს მეორედ მოსვლის მოახლოებას ეხება“.
MRFF არაკომერციული ორგანიზაციაა, რომლის მიზანიც აშშ-ის არმიის წევრების რელიგიური თავისუფლების უზრუნველყოფაა.
ოფიცერმა, რომელმაც ჯგუფს წერილი მისწერა, აღნიშნა, რომ შეტყობინებას აგზავნიდა თავისი და იმ ნაწილის 15 წევრის სახელით, რომლებიც რეგიონში „მზადყოფნის მხარდაჭერის“ მისიაში იმყოფებიან.
სააგენტო „ანადოლუმ“ (AA) საჩივრის ასლი მას შემდეგ მოიპოვა, რაც დამოუკიდებელმა ჟურნალისტმა ჯონათან ლარსენმა ეს საკითხი პირველად გაახმოვანა.
ეს შეტყობინება ერთ-ერთი იყო იმ 200-ზე მეტი წერილიდან, რომელიც ფონდმა 50-ზე მეტი სამხედრო ნაწილიდან მიიღო მას შემდეგ, რაც შაბათს პრეზიდენტმა დონალდ ტრამპმა ირანზე ფართომასშტაბიანი თავდასხმების დაწყება გამოაცხადა.
ტრამპმა საჯარო გამოსვლებში ირანის წინააღმდეგ მიმდინარე ომის მიზნებთან დაკავშირებით არაერთგვაროვანი განცხადებები გააკეთა. შაბათს გაზეთ ვაშინგტონ პოსტ-თან მოკლე სატელეფონო ინტერვიუში მან თქვა, რომ მისი მიზანი ირანელი ხალხისთვის „თავისუფლების“ მოპოვებაა, რაც რეჟიმის შეცვლის ირიბ მინიშნებად იქნა მიჩნეული.
მაშინაც კი, როდესაც ტრამპი ირანელებს მოუწოდებდა „დაებრუნებინათ თავიანთი ქვეყანა“ რევოლუციური მთავრობისგან, რომელიც ქვეყანას 1979 წლიდან მართავს, მისი მიზნები მომდევნო დღეებში მუდმივად იცვლებოდა.
ოფიციალურად, აშშ-ის მისია ირანში გულისხმობს ირანის კონვენციური ბალისტიკური რაკეტების პროგრამისა და ფლოტის განადგურებას, თეირანის რეგიონული მარიონეტული ძალების ქსელის დასრულებას და იმის უზრუნველყოფას, რომ ქვეყანამ ვერასდროს შექმნას ბირთვული იარაღი. ეს არის მიზანი, რომელსაც აშშ-ის მრავალი ადმინისტრაცია დიდი ხანია აჟღერებს. ირანი კი წლებია უარყოფს ბირთვული იარაღის შექმნის მცდელობას.
ოფიცერმა, რომლის ვინაობაც პენტაგონის მხრიდან შესაძლო შურისძიების შიშით არ საჯაროვდება, აღნიშნა, რომ მეთაურმა ქვედანაყოფს უთხრა: ტრამპს „ქრისტეს მიერ დაევალა არმაგედონის დაწყება და ქვეყნიერებაზე იესოს დაბრუნების მოახლოება“.
ოფიცერი აგრძელებს: „ამ ყველაფრის თქმისას მას სახეზე დიდი ღიმილი ჰქონდა, რაც მის გზავნილს კიდევ უფრო შემაძრწუნებელს ხდიდა. ჩვენს მეთაურს, სავარაუდოდ, აქვს პოზიცია „ჯერ ქრისტიანი“. ის დიდი ხანია ასე იქცევა და ნათლად აგრძნობინებს ყველას, რომ სურს მისი დაქვემდებარებული ყველა პირი მისნაირი ქრისტიანი იყოს. თუმცა, რაც მან ამ დილით გააკეთა, იმდენად ტოქსიკური და ზღვარგადასული იყო, რომ ბრიფინგზე მყოფი ბევრი ადამიანი შოკში ჩააგდო“.
სააგენტო „ანადოლუმ“ რამდენჯერმე მიმართა პენტაგონს კომენტარისთვის, თუმცა პასუხი ამ დრომდე არ მიუღია.
ისრაელ-აშშ-ის ერთობლივ თავდასხმებში რელიგიური ქვეტექსტები საკმაოდ მკაფიო იყო. თავდასხმის დაწყებიდან მეორე დღეს, ნეთანიაჰუმ მიუთითა თორის მცნებაზე, სადაც ირანის რეჟიმი ბიბლიური დროის ძველ მტერს შეადარა; ეს შედარება მანამდე პალესტინელების მიმართაც იყო გამოყენებული.
ირანული რაკეტის მიერ დაზიანებული ტერიტორიის დათვალიერებისას ნეთანიაჰუმ თქვა: „ამ კვირის თორის მონაკვეთში ვკითხულობთ: „გახსოვდეს, რა დაგიშავა ამალეკმა“. ჩვენ გვახსოვს და ვმოქმედებთ“.
ამალეკელები ძველ აღთქმაში ისრაელიანების მუდმივ მტრებად არიან აღწერილნი და მათი ხსენების ამოძირკვის მცნებაზეა საუბარი.
მზარდი რელიგიური რიტორიკა: „გადაუდებელი საფრთხე“
მაიკი ვაინშტაინი, საჰაერო ძალების ყოფილი ოფიცერი და რონალდ რეიგანის ადმინისტრაციის იურიდიული მრჩეველი, ამჟამად MRFF-ის პრეზიდენტია. მან განაცხადა, რომ თავდაცვის მდივანი პიტ ჰეგსეთი გასულ წელს თანამდებობის დაკავების დღიდან პენტაგონში ეკლესიასა და სახელმწიფოს შორის არსებულ ბარიერებს „უროთი ანგრევს“.
ვაინშტაინმა თქვა: „MAGA-მ (Make America Great Again) ყველაფერი გააფუჭა. მათი გამოსავალია იყო ჰეტეროსექსუალი, თეთრკანიანი, ქრისტიანი და მამაკაცი. როდესაც ქრისტიანულ ნაციონალიზმს ხვდები სკოლებში, უნივერსიტეტებში, პოლიციაში ან სახანძრო სამსახურში, ეს უკვე საკმარისად ცუდია. მაგრამ როდესაც ამას ხედავ იქ, სადაც ბირთვული იარაღი, ლაზერული სისტემები და დრონებია, ეს არის აბსოლუტური და გადაუდებელი საფრთხე ჩვენი ქვეყნისა და მსოფლიოს ეროვნული უსაფრთხოებისთვის“.
აღინიშნება, რომ პენტაგონში რელიგიური ელემენტების შეტანის მცდელობის ნაწილია რეგულარული ყოველთვიური ლოცვის შეხვედრები, რომლებშიც მონაწილეობს ულტრამემარჯვენე ევანგელისტი ქრისტიანი ნაციონალისტი დუგ უილსონი - ადამიანი, რომელიც იცავს მონობას, მხარს უჭერს ქალთა უფლებების შეზღუდვას და აშშ-ის თეოკრატიად გადაქცევის იდეას აჟღერებს.
ვაინშტაინის თქმით: „ის, რასაც ჰეგსეთი აკეთებს, არის აშშ-ის არმიის არსის დაშლა და კონსტიტუციის პირველი შესწორების განადგურება. არმიის მთავარი ინტერესი უნდა იყოს მისი საბრძოლო ეფექტურობის, დისციპლინის, მორალისა და ერთიანობის მაქსიმუმამდე აყვანა“.
მრავალეთნიკურ და მრავალკონფესიურ არმიაში ქრისტიანული ნაციონალიზმის შეტანა სრულ წინააღმდეგობაშია შეიარაღებული ძალების ფუნდამენტურ პრინციპებთან.
ვაინშტაინმა დაამატა, რომ ტრამპის მიერ ირანთან ომის დაწყების გადაწყვეტილების შემდეგ, მათ ოფისში შესული საჩივრების რაოდენობა მკვეთრად გაიზარდა. „საჩივრების ტალღამ იფეთქა,“ - თქვა მან. - „როგორც კი ყინული გატყდა, ყველაფერმა ნიაღვარივით წამოხეთქა“.
