თურქეთის საგარეო საქმეთა მინისტრმა ჰაქან ფიდანმა განაცხადა, რომ აშშ-ის პრეზიდენტი დონალდ ტრამპი 7-8 ივლისს ანკარაში დაგეგმილ ნატოს სამიტზე დასწრებას გეგმავს.
ორშაბათს, სინგაპურში ვიზიტისას Bloomberg TV-სთვის მიცემულ ინტერვიუში, კითხვაზე, დაესწრება თუ არა ტრამპი ანკარის სამიტს, ფიდანმა უპასუხა: „რამდენადაც ჩვენთვის ცნობილია, დიახ, ის დასწრებას გეგმავს“.
ფიდანმა აღნიშნა, რომ თურქეთის პრეზიდენტ რეჯეფ თაიფ ერდოღანს გასულ თვეში ტრამპთან რამდენიმე სატელეფონო საუბარი ჰქონდა და აშშ-ის პრეზიდენტმა ყოველ ჯერზე დაადასტურა სამიტზე დასწრების სურვილი.
ფიდანმა ხაზგასმით აღნიშნა, რომ პოლიტიკური რიტორიკის მიუხედავად, აშშ ნატოს ალიანსის ერთგული რჩება და არ არსებობს იმის ნიშნები, რომ ვაშინგტონი აპირებს განახორციელოს მუქარა ნატოდან გამოსვლის შესახებ.
ფიდანმა განაცხადა: „აშშ მუდმივად ახდენს ზეწოლას მოკავშირეებზე, რათა მათ გაზარდონ თავდაცვის ხარჯები და აიღონ მეტი პასუხისმგებლობა საკუთარ უსაფრთხოებაზე. ევროპელებმა ეს გზავნილი მიიღეს და უკვე გადადგეს ნაბიჯები ნატოს ფარგლებში თავდაცვის ბიუჯეტების გასაზრდელად. როდესაც ლიდერები შეიკრიბებიან, ჩვენ მიღწეულ პროგრესს განვიხილავთ“.
ფიდანმა ასევე ხაზი გაუსვა ანკარის მხარდაჭერას აშშ-სა და ირანს შორის მიმდინარე მოლაპარაკებებისადმი და აღნიშნა, რომ ორივე მხარე „გულწრფელ“ ძალისხმევას იჩენს ზავის გასახანგრძლივებლად.
მიუხედავად ცეცხლის შეწყვეტისა, საგარეო საქმეთა მინისტრმა გააფრთხილა, რომ ისრაელის თავდასხმები სამხრეთ ლიბანში „ჰეზბოლას“ წინააღმდეგ ქმნის „მნიშვნელოვან რისკს“, რამაც შეიძლება მოლაპარაკებები ჩაშალოს. „დარწმუნებული ვარ, რომ ამერიკელები და ირანელები გულწრფელები არიან. მათ სურთ ზავი და ჰორმუზის სრუტის გახსნა, თუმცა ისრაელის განზრახვებში დარწმუნებული არ ვარ“, - განაცხადა მან.
აშშ-ისა და ისრაელის მიერ თებერვალში ირანზე განხორციელებული თავდასხმების შემდეგ ახლო აღმოსავლეთში დაძაბულობა გამწვავდა. თეირანმა საპასუხოდ ჰორმუზის სრუტე ჩაკეტა და იერიშები მიიტანა ისრაელისა და აშშ-ის მოკავშირეებზე სპარსეთის ყურეში.
პაკისტანის შუამავლობით მიღწეული ცეცხლის შეწყვეტის შეთანხმება ძალაში 8 აპრილს შევიდა, თუმცა ისლამაბადში გამართულ მოლაპარაკებებზე მუდმივი შეთანხმების მიღწევა ვერ მოხერხდა.
მას შემდეგ ორივე მხარე აგრძელებს წინადადებების გაცვლას პირდაპირი მოლაპარაკებების განახლებისა და კონფლიქტის დასრულების მიზნით.
