რუსეთის გავლენიანმა უშიშროების საბჭოს თავმჯდომარის მოადგილემ ორშაბათს გაკეთებულ განცხადებაში აღნიშნა, რომ თუ აშშ-ის პრეზიდენტი დონალდ ტრამპი გააგრძელებს თავის „გიჟურ მიდგომას პოლიტიკური რეჟიმების დანაშაულებრივი გზით შეცვლისკენ“, მესამე მსოფლიო ომი დაიწყება.
რუსეთის სახელმწიფო საინფორმაციო სააგენტო TASS-თან ინტერვიუში დიმიტრი მედვედევმა ვაშინგტონის ქმედებებს უწოდა „აშშ-ისა და მისი მოკავშირეების ომი გლობალური დომინირების შესანარჩუნებლად“.
მედვედევმა აღნიშნა: „თუ ტრამპი გააგრძელებს თავის გიჟურ კურსს და პოლიტიკური რეჟიმების დანაშაულებრივ ცვლილებებს, ეს (ომი) აუცილებლად დაიწყება. და ნებისმიერი მოვლენა შეიძლება გახდეს ტრიგერი (გამომწვევი მიზეზი)“. მედვედევმა, „ნებისმიერი მოვლენის“ შესახებ გაფრთხილებისას, ასევე შეაფასა, რომ ირანის მიერ „წმინდა ომის“ გამოცხადების შემდეგ აშშ-ისა და ისრაელის ოფიციალური პირების დაუცველობა „მნიშვნელოვნად გაიზარდა“.
მედვედევმა განაცხადა: „ის ფაქტი, რომ ირანელებს ჯერჯერობით ძალიან სერიოზული პასუხი არ გაუციათ, არ ნიშნავს იმას, რომ მათ ბევრი შესაძლებლობა არ აქვთ. მაგრამ მათ იციან ლოდინი; ისინი უძველესი ცივილიზაციაა“.
ტრამპის „უხეში შეცდომა“
მედვედევმა, რომელიც 2008-2012 წლებში რუსეთის პრეზიდენტი იყო, აღნიშნა, რომ „ტრამპმა უხეში შეცდომა დაუშვა“. მისი თქმით: „თავისი გადაწყვეტილებით მან ყველა ამერიკელი პოტენციური საფრთხის ქვეშ დააყენა, იმის მიუხედავად, რომ ირანის რეჟიმი მეზობელ არაბულ ქვეყნებში შეიძლება არ უყვარდეთ“.
კითხვაზე, აქვს თუ არა ირანს ამ კონფლიქტთან გამკლავების ძალა, მედვედევმა უპასუხა: „ისინი გაუმკლავდებიან, მაგრამ აღორძინების ფასი მაღალი იქნება. ეს მოითხოვს საზოგადოების მაღალ კონსოლიდაციას. და ამერიკელებმა სწორედ ასეთი კონსოლიდაცია უზრუნველყვეს“.
ევროპის ქვეყნების რეაქციას აშშ-ისა და ისრაელის ქმედებებზე მედვედევმა „პირფერობა და სიმდაბლე“ უწოდა. მან თქვა: „ევროპელი ქვეშევრდომები, მას შემდეგ, რაც თვალებში პირდაპირ მიიღეს ამერიკულ-ისრაელური „ყვითელი ცვარის“ დოზა, ვნებითა და სიამოვნებით იწმენდენ სახეს“.
კითხვაზე, აუკრძალავს თუ არა საერთაშორისო ოლიმპიური კომიტეტი (IOC) აშშ-ისა და ისრაელის სპორტსმენებს შეჯიბრებებში მონაწილეობას, ისევე როგორც ეს რამდენიმე წლის წინ რუს სპორტსმენებს გაუკეთა, მედვედევმა გაიხსენა ფრანგი ისტორიკოსის, პიერ დე კუბერტენის პრინციპები და აღნიშნა, რომ IOC და ოლიმპიური მოძრაობა უნდა დაიშალოს და ხელახლა აშენდეს.
„აშშ-ს ეშინია რუსეთის“
მედვედევი რუსეთ-უკრაინის მოლაპარაკებებსაც შეეხო და აღიარა, რომ არსებობს საფრთხე, მოსკოვს „არწმუნებდნენ“ კიევთან მოლაპარაკებებში მხოლოდ იმ მიზნით, რომ უკრაინას ძალების შესავსებად დრო მიეცეს.
კითხვაზე, არსებობს თუ არა რაიმე გარანტია, რომ დასავლეთის დედაქალაქებში ვინმე ერთ დღესაც არ გადაწყვეტს პრობლემის მოგვარებას მოსკოვთან ძალისმიერი მეთოდით, მედვედევმა თქვა: „სულელებისა და კლინიკური ნაძირლების ქმედებების წინააღმდეგ ჯადოსნური გამოსავალი არ არსებობს და ვერც იარსებებს“. თუმცა, მან დაამატა: „მაგრამ ერთი რამ გარანტირებულია: აშშ-ს ეშინია რუსეთის და იცის ბირთვული კონფლიქტის ფასი. ასეთი კონფლიქტი რომ მომხდარიყო, ჰიროშიმა და ნაგასაკი ბავშვის სათამაშოსავით გამოჩნდებოდა ქვიშის ყუთში“.
