თურქეთის ენერგეტიკისა და ბუნებრივი რესურსების მინისტრმა, ალფარსლან ბაირაქთარმა განაცხადა, რომ თურქეთი გეგმავს პაკისტანთან ოფიციალურად გააფორმოს ახალი ენერგეტიკული შეთანხმება, რომელიც ხმელეთსა და ზღვაში ნავთობისა და ბუნებრივი აირის ძიებას მოიცავს.
ოთხშაბათს გაკეთებულ განცხადებაში ბაირაქთარმა აღნიშნა, რომ შეთანხმების გასაფორმებლად მომავალ კვირას პაკისტანში გაემგზავრება.
„Lider Haber“-თან საუბრისას ბაირაქთარმა განაცხადა: „ჩვენ ხელს მოვაწერთ შეთანხმებას, რომელიც პაკისტანში პირველ ღრმა ბურღვით სამუშაოებსა და საზღვაო საბადოებს ეხება. ვიწყებთ ერთობლივ მუშაობას ორ სახმელეთო და ერთ საზღვაო საბადოზე“.
„Daily Sabah“-ის ცნობით, ხელმოწერის ცერემონია სავარაუდოდ სამშაბათს გაიმართება.
პაკისტანის მთავრობამ თებერვალში გამოაცხადა, რომ მაკრანისა და ინდის აუზებში საძიებო ლიცენზიების გასაცემად ტენდერი 40 საზღვაო ბლოკზე გამოცხადდა.
თურქეთმა და პაკისტანმა აპრილში ხელი მოაწერეს შეთანხმებას, რათა ერთობლივი წინადადება წარედგინათ ნავთობისა და გაზის საძიებო ტენდერებზე, რომელიც პაკისტანის 40 სხვადასხვა საზღვაო ბლოკს მოიცავს.
პაკისტანურმა კომპანიებმა: „Mari Energies Limited“-მა, „Oil and Gas Development Company Limited“-მა და „Pakistan Petroleum Limited“-მა ხელი მოაწერეს შეთანხმებას „თურქეთის ნავთობის კორპორაციასთან“ (TPAO), საზღვაო ტენდერებში ერთობლივი მონაწილეობის შესახებ.
ივლისში ისლამაბადში ოფიციალური ვიზიტის დროს, თურქეთის საგარეო საქმეთა მინისტრმა ჰაკან ფიდანმა განაცხადა, რომ თურქული კომპანიები პაკისტანის საზღვაო რეზერვებში ნავთობისა და გაზის ძიებას განახორციელებენ.
პაკისტანის ვიცე-პრემიერთან და საგარეო საქმეთა მინისტრთან, მუჰამედ იშაკ დართან ერთობლივ პრესკონფერენციაზე ფიდანმა ხაზი გაუსვა ანკარის განზრახვას, გააღრმავოს კავშირები ისლამაბადთან ეკონომიკისა და ენერგეტიკის სფეროებში და აღნიშნა, რომ იმუშავებენ ორ ქვეყანას შორის სავაჭრო ბრუნვის 5 მილიარდ დოლარამდე გაზრდაზე.
ოქტომბერში, ისლამაბადის მიერ განახლებული საზღვაო ენერგეტიკული ძიების ინიციატივის ფარგლებში, TPAO-მ პაკისტანის „აღმოსავლეთ ოფშორული ინდის C-ბლოკში“ 25%-იანი წილი და ოპერირების უფლება მოიპოვა.
