ირანში, ისპაჰანის ერთ-ერთ საჯარო მოედანზე, სიკვდილით დასაჯეს ორი პირი, რომლებსაც ბრალად ედებოდათ სხვადასხვა დანაშაულის ჩადენა ქუჩის აქციების დროს. აღნიშნული აქციები ირანში ეკონომიკური მიზეზებით დაიწყო და მოგვიანებით ანტისამთავრობო დემონსტრაციებში გადაიზარდა.

ირანის სასამართლო ხელისუფლების კუთვნილ საინფორმაციო სააგენტო „მიზანის“ ცნობით, სასამართლო ორგანოებმა წერილობითი განცხადება გაავრცელეს.

განცხადებაში აღნიშნულია, რომ აბულფაზლ სიპაჰი და ამირ ჰუსეინ საფარი იანვრის გამოსვლების დროს ჩადენილი შემდეგი ქმედებებისთვის გასამართლდნენ: „დედამიწაზე კორუფციის გავრცელება“ (Mofsed-e-filarz), „ომი ღვთის წინააღმდეგ“ (Moharebeh), „საზოგადოებაში შიშისა და დაუცველობის დათესვა“, „ეროვნული უსაფრთხოების წინააღმდეგ მიმართულ ჯგუფებში წევრობა“, „საზოგადოებრივი წესრიგის დარღვევის მიზნით სახელმწიფო ქონების დაზიანება“ და „მოვლენებში მონაწილეობა, რამაც ოთხი სამართალდამცველის დაღუპვა გამოიწვია“.

სასამართლო პროცესის შედეგად, ხსენებულ პირებს სიკვდილით დასჯა მიესაჯათ. სააპელაციო ეტაპზე ქვეყნის უზენაესმა სასამართლომ განაჩენი ძალაში დატოვა.

მსჯავრდებულები, რომელთა განაჩენიც საბოლოო იყო, დღეს დილით ისპაჰანის ერთ-ერთ საჯარო მოედანზე სიკვდილით დასაჯეს.

საპროტესტო აქციები ირანში

ირანში გამოსვლები 2025 წლის 28 დეკემბერს თეირანის „დიდ ბაზარში“ მოვაჭრეების ინიციატივით დაიწყო. პროტესტის მიზეზი ეროვნული ვალუტის მკვეთრი გაუფასურება და ეკონომიკური პრობლემების გაღრმავება გახდა, რის შემდეგაც აქციები მთელ ქვეყანას მოედო.

მას შემდეგ, რაც 8 იანვარს დედაქალაქ თეირანში პროტესტი გამწვავდა, ქვეყნის ხელისუფლებამ ინტერნეტზე წვდომა შეზღუდა.

ირანელ ოფიციალურ პირებს მომხდარი მოვლენების დროს დაღუპულთა თუ დაშავებულთა საერთო რაოდენობაზე ოფიციალური განცხადება ამ დრომდე არ გაუკეთებიათ. თუმცა, აშშ-ში ბაზირებული „ირანის ადამიანის უფლებათა აქტივისტების საინფორმაციო სააგენტოს“ (HRANA) მონაცემებით, შეტაკებების შედეგად 5 858 ადამიანი დაიღუპა, ხოლო 41 283 პირი დააკავეს.

ირანის „წამებულთა და ვეტერანთა ფონდის“ სასამართლო ექსპერტიზის ინსტიტუტის მიერ 21 იანვარს გაკეთებულ განცხადებაში კი აღნიშნული იყო, რომ გამოსვლებისას, უსაფრთხოების ძალებისა და მშვიდობიანი მოქალაქეების ჩათვლით, სულ 3 117 ადამიანი დაიღუპა.

ამ განცხადების მიხედვით, მათგან 2 427 პირი „ტერორისტული ჯგუფების“ მიერ მოკლული სამართალდამცველი და მშვიდობიანი მოქალაქეა, ხოლო დარჩენილ 690 ადამიანზე ინფორმაცია არ გავრცელებულა.