ისრაელის ხელისუფლებამ, ირანის წინააღმდეგ მიმდინარე ომის გამო დაწესებული უსაფრთხოების შეზღუდვების მოტივით, ოკუპირებულ აღმოსავლეთ იერუსალიმში მდებარე ალ-აქსას მეჩეთში რამადან ბაირამის (იდ ალ-ფიტრის) ლოცვები აკრძალა.
პალესტინელებმა მორწმუნეებს მოუწოდეს, რამადანის თვის დასრულებასთან დაკავშირებით ლოცვა ალ-აქსასთან რაც შეიძლება ახლოს აღავლინონ და ამ მიზნით ძველი ქალაქის მიმდებარედ შეიკრიბონ.
ისრაელის პოლიციამ მანამდე არაერთხელ გამოიყენა ხელკეტები, ხმოვანი ყუმბარები და ცრემლსადენი გაზი იმ პალესტინელების წინააღმდეგ, რომლებიც რამადანის განმავლობაში ალ-აქსაზე დაწესებულ შეზღუდვებს აპროტესტებდნენ და ძველი ქალაქის კედლების მიღმა ლოცულობდნენ.
ოკუპირებული აღმოსავლეთ იერუსალიმი სადღესასწაულო პერიოდს მძიმე ატმოსფეროთი შეხვდა. წინასადღესასწაულო დღეებში ძველი ქალაქი, რომელიც ჩვეულებრივ პალესტინელებით არის სავსე, საზარელმა სიჩუმემ მოიცვა და თითქმის „მოჩვენებათა ქალაქს“ დაემსგავსა.
ისრაელმა შეკრების აკრძალვის საბაბით რეგიონში გადაადგილება შეზღუდა; პალესტინელ მოვაჭრეებს მაღაზიების გახსნა აეკრძალათ და მუშაობის უფლება მხოლოდ აფთიაქებსა და პირველადი მოხმარების პროდუქტების მაღაზიებს დართეს.
პალესტინელმა ვაჭრებმა, რომლებმაც ისრაელის მხრიდან შესაძლო საპასუხო ზომების (რეპრესიების) შიშით ვინაობის გამჟღავნება არ ისურვეს, აღნიშნეს, რომ დაწესებულმა შეზღუდვებმა ისინი მძიმე ეკონომიკურ კრიზისამდე მიიყვანა.
