ჰოლანდიური გაზეთის, De Volkskrant-ის მიერ მომზადებულმა დეტალურმა საგამოძიებო ანგარიშმა, რომელიც ღაზაში ბავშვების მიზანმიმართულ მკვლელობებს ასახავს, ევროპის ერთ-ერთი ყველაზე პრესტიჟული ჟურნალისტური ჯილდო - 2026 წლის ევროპის პრესის ჯილდო (European Press Prize) დაიმსახურა.
დაჯილდოებული ნამუშევარი სათაურით „რას გვიყვებიან ჭრილობები“, De Volkskrant-ის ჟურნალისტების, მოდ ეფტინგისა და ვილემ ფენსტრას მიერ არის მომზადებული. კვლევამ დოკუმენტურად დაადასტურა 15 წლამდე ასაკის 114 ბავშვის შემთხვევა, რომელთაგან თითოეულს თავში ან გულმკერდში ერთი ტყვია ჰქონდა მოხვედრილი. ანგარიშის მიხედვით, ამ ბავშვების თითქმის ყველა დაიღუპა ან მძიმე ინვალიდობა დარჩა.
„ევროპის პრესის ჯილდოს“ ოფიციალურ განცხადებაში ნათქვამია: „ეს არის არაჩვეულებრივი ჟურნალისტური ნამუშევარი, რომელიც შესრულებულია განსაკუთრებულ პირობებში. იმ დროს, როდესაც ღაზაში დამოუკიდებელი წვდომა თითქმის შეუძლებელი იყო, ეფტინგმა და ფენსტრამ ჩაატარეს ზედმიწევნითი გამოძიება საერთაშორისო სამედიცინო ექსპერტების ჩვენებებისა და დოკუმენტების საფუძველზე, რომლებიც ღაზას საავადმყოფოებსა და კლინიკებში მუშაობდნენ“.
ჟურნალისტებმა აქცენტი სპეციალურად 15 წლამდე ასაკის ბავშვებზე (რომელთაგან ბევრი 3, 4 ან 7 წლისაა) გააკეთეს. ეფტინგმა და ფენსტრამ თავიანთ სტატიაში აღნიშნეს: „სხეულის თავის ან გულმკერდის არეში ერთი ტყვია არის ნათელი მაჩვენებელი იმისა, რომ ეს ბავშვები მიზანმიმართულად იყვნენ ამოღებული სამიზნედ“.
გაზეთმა გამოკითხა აშშ-დან, დიდი ბრიტანეთიდან, ავსტრალიიდან, კანადიდან და ნიდერლანდებიდან ჩასული 17 ექიმი და ერთი მედდა, რომლებიც 2023 წლის ოქტომბრიდან მოყოლებული ღაზას ექვს საავადმყოფოსა და ოთხ კლინიკაში მუშაობდნენ. ამ ექიმების უმეტესობას კრიზისულ ზონებში (მათ შორის სუდანში, ავღანეთსა და უკრაინაში) მუშაობის მრავალწლიანი გამოცდილება ჰქონდა.
15-მა ექიმმა De Volkskrant-ს განუცხადა, რომ 15 წლის და უფრო მცირე ასაკის მინიმუმ 114 ბავშვი თავის ან გულმკერდის არეში მიყენებული ერთი ტყვიის ჭრილობით დაშავდა. შემთხვევები დოკუმენტირებულია 10 სამედიცინო დაწესებულებაში 2023 წლის ბოლოდან 2025 წლის შუა პერიოდამდე.
კვლევის მიხედვით, ამერიკელმა ტრავმატოლოგ-ქირურგმა ფეროზ სიდჰვამ გაიხსენა, რომ 2024 წლის მარტში, ღაზას ევროპულ საავადმყოფოში მუშაობის პირველ ორ დღეში, 10 წლამდე ასაკის ოთხ ბავშვს თავში იდენტური ჭრილობა ჰქონდა მიყენებული. „როგორ არის შესაძლებელი, რომ ამ პატარა საავადმყოფოში, 48 საათის განმავლობაში, თავში ნასროლი ოთხი ბავშვი მოიყვანონ?“ - განუცხადა სიდჰვამ გაზეთს.
მომდევნო 13 დღის განმავლობაში ექიმმა კიდევ ცხრა ბავშვი ნახა მსგავსი დაზიანებებით. გამოკითხულმა ექიმებმა ხაზგასმით აღნიშნეს, რომ ასეთი დაზიანებების შემთხვევითობის ალბათობა ძალიან დაბალია. სასამართლო ექსპერტებმა, რომლებსაც გაზეთმა კონსულტაციისთვის მიმართა, განაცხადეს, რომ ასეთი ტიპის ერთნაირი ჭრილობები მიუთითებს მიზანმიმართულ თავდასხმაზე, რომელიც სავარაუდოდ სნაიპერების ან უპილოტო საფრენი აპარატების მიერ არის განხორციელებული.
ევროპის პრესის ჯილდო არის კონტინენტის ერთ-ერთი ყველაზე პრესტიჟული ჟურნალისტური ჯილდო, რომელიც გადაეცემა გამორჩეულ ნამუშევრებს მთელი ევროპის მასშტაბით.
