პოლიციისა და სამაშველო სამსახურის წარმომადგენლებმა განაცხადეს, რომ ორშაბათს დილით, პაკისტანის ჩრდილო-დასავლეთში უსაფრთხოების ძალების შტაბზე თვითმკვლელი ტერორისტის თავდასხმა განხორციელდა, რასაც სულ მცირე სამი მოსამსახურე ემსხვერპლა. თავდასხმის დროს სამივე თავდამსხმელი დაიღუპა.
ტერორისტული თავდასხმა პეშავარში, ავღანეთის მოსაზღვრე ხაიბერ-პახტუნხვას პროვინციის დედაქალაქში მოხდა.
პეშავარის პოლიციის უფროსმა, მიან საიდმა განაცხადა, რომ დაიღუპა კართან განლაგებული ფედერალური დაცვის (FC) სამი თანამშრომელი და დაშავდა ოთხი ადამიანი. მან აღნიშნა, რომ ერთმა თავდამსხმელმა ფედერალური ჟანდარმერიის პროვინციული შტაბის მთავარ შესასვლელთან აიფეთქა თავი, ხოლო დანარჩენი ორი, რომლებმაც ტერიტორიაზე შეღწევა მოახერხეს, უსაფრთხოების ძალებმა მოკლეს.
საიდმა განაცხადა, რომ უსაფრთხოების ძალების სწრაფმა რეაგირებამ უფრო დიდი მსხვერპლი აივიცილა თავიდან და სიტუაცია მალევე დაექვემდებარა კონტროლს.
პრეზიდენტმა ასიფ ალი ზარდარიმ და პრემიერ-მინისტრმა შაჰბაზ შარიფმა თავდასხმა დაგმეს და უსაფრთხოების ძალებს მადლობა გადაუხადეს სწრაფი რეაგირებისთვის, რამაც „ძვირფასი სიცოცხლეების“ გადარჩენა უზრუნველყო.
ორივე ლიდერმა, ცალ-ცალკე გაკეთებულ განცხადებებში, პირობა დადო, რომ ამ „ლაჩრული თავდასხმების“ მიუხედავად, ქვეყანა ტერორიზმთან ბრძოლას გააგრძელებს.
თავდასხმაზე პასუხისმგებლობა ჯერჯერობით არცერთ დაჯგუფებას არ აუღია.
თუმცა, ქვეყანაში, სადაც ტერაქტები გახშირდა, პასუხისმგებლობა ორგანიზაცია „თეჰრიკ-ი-თალიბან პაკისტანს“ (TTP) ეკისრება, რომელსაც ადრეც არაერთ მსგავს თავდასხმაში ადანაშაულებდნენ.
თავდასხმებმა ისლამაბადსა და ავღანეთის თალიბანის მთავრობას შორის ურთიერთობების დაძაბვა გამოიწვია. პაკისტანი ამტკიცებს, რომ 2021 წელს თალიბანის ხელისუფლებაში დაბრუნების შემდეგ TTP ავღანეთში თავისუფლად მოქმედებს, რასაც ქაბული უარყოფს.
