რუბიო: მოლაპარაკებებმა ნაყოფიერად ჩაიარა, ჯერ კიდევ ბევრი საქმეა გასაკეთებელი

აშშ-მა და უკრაინამ ვაშინგტონის გეგმის ფარგლებში, რომელიც უკრაინის ომის შეჩერებას ისახავს მიზნად, გამართული შეხვედრები „ნაყოფიერად“ შეაფასეს, თუმცა ორივე მხარემ ხაზგასმით აღნიშნა, რომ ეს კრიტიკული მოლაპარაკებები დასრულებისგან ჯერ კიდევ შორს არის.

აშშ-ის სახელმწიფო მდივანმა მარკო რუბიომ კვირას გაკეთებულ განცხადებაში აღნიშნა, რომ გასაკეთებელი ჯერ კიდევ ბევრია. კიევის დელეგაციის ერთ-ერთმა წყარომ კი მოლაპარაკებები შეაფასა, როგორც „არცთუ ისე იოლი“.

ვაშინგტონმა თითქმის ოთხწლიანი ომის დასასრულებლად გეგმა წარმოადგინა და მიზნად ისახავს, მოსკოვისა და კიევის თანხმობით, მისი საბოლოო სახით ჩამოყალიბებას.

ჟენევაში გამართული შეხვედრების შემდეგ წარმოებულმა ამ მოლაპარაკებებმა, შესაძლოა, ნიადაგი მოამზადოს აშშ-ის პრეზიდენტის, დონალდ ტრამპის სპეციალური წარმომადგენლის, სტივ ვიტკოფის მოსკოვში ვიზიტისთვისაც. მოსალოდნელია, რომ ვიტკოფი რუსეთის პრეზიდენტ ვლადიმერ პუტინთან უკრაინის საკითხს განიხილავს.

„ჟენევის მოლაპარაკებების საფუძველზე და ამ კვირის მოვლენების გათვალისწინებით, კიდევ ერთი ძალიან ნაყოფიერი სხდომა გავმართეთ. თუმცა, სამუშაო ჯერ კიდევ ბევრია. ეს პროცესი მგრძნობიარე და რთულია“, — განაცხადა რუბიომ.

სახელმწიფო მდივანმა რუბიომ დაამატა: „ბევრი ცვალებადი რამ არსებობს და, რა თქმა უნდა, არის კიდევ ერთი მხარე, რომელიც ამ განტოლებაში უნდა მონაწილეობდეს. ეს საკითხი ვიტკოფის ამ კვირაში მოსკოვში ვიზიტით გაგრძელდება“.

მარკო რუბიოს განცხადებების შემდეგ, აშშ-ის პრეზიდენტმა დონალდ ტრამპმაც გააკეთა განცხადება და აღნიშნა, რომ ფლორიდაში გამართული შეხვედრების შემდეგ ომის დასრულების შეთანხმების მიღწევის „კარგი შესაძლებლობა“ არსებობს, თუმცა ასევე აღნიშნა, რომ მიმდინარე კორუფციული სკანდალი პროცესს ართულებს.

აშშ-ის ოფიციალური პირის ცნობით, მოსალოდნელია, რომ ვიტკოფი ორშაბათს მოსკოვში გაემგზავრება და რუსეთის პრეზიდენტ ვლადიმერ პუტინს შეხვდება.