ჩინეთის სახელმწიფო ტელევიზიის CCTV-ის ინფორმაციით, პრეზიდენტმა სი ძინპინმა ხუთშაბათს განაცხადა, რომ ევროკავშირმა „სწორი სტრატეგიული არჩევანი უნდა გააკეთოს“ და გლობალური გაურკვევლობის ფონზე, კავშირის ლიდერებს „ნდობისა და კომუნიკაციის გაძლიერებისკენ“ მოუწოდა.
პეკინში, ხალხის დიდ დარბაზში დაწყებული ევროკავშირი-ჩინეთის 25-ე სამიტის გახსნით სიტყვაში, სიმ ხაზგასმით აღნიშნა, რომ ჩინელმა და ევროპელმა ლიდერებმა ხალხის მოლოდინები უნდა გაამართლონ.
ჩინეთის პრეზიდენტი სი ძინპინი და პრემიერ-მინისტრი ლი ციანი ევროკომისიის პრეზიდენტს, ურსულა ფონ დერ ლაიენს, და ევროპული საბჭოს პრეზიდენტს, ანტონიო კოსტას შეხვდნენ.
სიმ ფონ დერ ლაიენსა და კოსტას მიმართა: „რაც უფრო სერიოზული და რთული ხდება საერთაშორისო ვითარება, მით უფრო უნდა გაძლიერდეს კომუნიკაცია ჩინეთსა და ევროკავშირს შორის, გაიზარდოს ურთიერთნდობა და კიდევ უფრო გაღრმავდეს თანამშრომლობა“.
„ურთიერთსასარგებლო თანამშრომლობა“
დღის წესრიგში ასევე დგას ისეთი საკითხები, როგორიცაა სავაჭრო დისბალანსი, ბაზრებზე წვდომა და იშვიათი მიწის ელემენტები.
ევროკომისიის პრეზიდენტმა ურსულა ფონ დერ ლაიენმა სამიტი შეაფასა, როგორც „ჩვენი ურთიერთობების წინსვლისა და ხელახლა დაბალანსების შესაძლებლობა“.
სამიტამდე ცოტა ხნით ადრე, ფონ დერ ლაიენმა X-ის საკუთარ გვერდზე დაწერა: „მჯერა, რომ ურთიერთსასარგებლო თანამშრომლობა შესაძლებელია“.
სამიტი ორივე მხარეს შორის დიპლომატიური ურთიერთობების 50-ე წლისთავს ეძღვნება. ჩინეთსა და ევროკავშირს შორის წლიური სავაჭრო ბრუნვა 860 მილიარდ დოლარს აღემატება.
