ჯანდაცვის მსოფლიო ორგანიზაციამ (ჯანმო) განაცხადა, რომ ომით განადგურებულ ღაზაში ბოლო წელიწადნახევრის განმავლობაში 1000-ზე მეტი პაციენტი დაიღუპა გადაუდებელი სამედიცინო ევაკუაციის მოლოდინში.

ჯანმო-ს ხელმძღვანელმა, ტედროს ადჰანომ გებრეიესუსმა პარასკევს X-ზე გამოქვეყნებულ პოსტში აღნიშნა, რომ ომის დაწყებიდან (ორი წლის წინ) მოყოლებული, გაეროს სააგენტომ და მისმა პარტნიორებმა „ღაზიდან ჯანმრთელობის სერიოზული პრობლემების მქონე 10 600-ზე მეტი პაციენტის ევაკუაცია განახორციელეს, რომელთაგან 5 600-ზე მეტი ბავშვია“.

თუმცა, მან გააფრთხილა, რომ „კიდევ ბევრი პაციენტი რჩება ღაზაში, რომლებიც შესაბამისი სამედიცინო დახმარების მისაღებად ევაკუაციას ელიან“.

ღაზის ჯანდაცვის სამინისტროს მონაცემებზე დაყრდნობით, ტედროსმა განაცხადა, რომ მხოლოდ 2024 წლის ივლისიდან 2025 წლის 28 ნოემბრამდე პერიოდში, სამედიცინო ევაკუაციის მოლოდინში 1092 პაციენტი გარდაიცვალა.

მან აღნიშნა, რომ „ეს მაჩვენებელი, სავარაუდოდ, იმაზე ნაკლებია, ვიდრე სინამდვილეშია“ და მოუწოდა „მეტი ქვეყანა გაუხსნას კარი ღაზიდან ჩამოსულ პაციენტებს და განახლდეს სამედიცინო ევაკუაცია დასავლეთ სანაპიროზე, მათ შორის აღმოსავლეთ იერუსალიმში“.

„სიცოცხლეები ამაზეა დამოკიდებული“ - დასძინა მან.

ჯანმო-ს სპიკერმა, ტარიკ იაშარევიჩმა პარასკევს ჟენევაში ჟურნალისტებს განუცხადა, რომ დაახლოებით 18 500 პაციენტს კვლავ ესაჭიროება მკურნალობა ღაზის გარეთ, მათ შორის 4 000-ზე მეტ ბავშვს.

ორგანიზაცია „ექიმები საზღვრებს გარეშე“-ს (MSF) წარმომადგენელმა ამ თვის დასაწყისში სააგენტო AFP-ს განუცხადა, რომ ჯანმო-ს მონაცემები მხოლოდ რეგისტრირებულ პაციენტებს ასახავს და იმ ადამიანების რეალური რაოდენობა, რომლებსაც სასწრაფო ევაკუაცია ესაჭიროებათ, ამაზე რამდენჯერმე მეტია.

იაშარევიჩმა ხაზგასმით აღნიშნა: „ამ ადამიანების უმეტესობას ლოდინის დრო არ აქვს“.

აშშ-ის ეგიდით მიღწეულმა ცეცხლის შეწყვეტის შეთანხმებამ ღაზაში საბრძოლო მოქმედებები შეაჩერა, თუმცა 10 ოქტომბრიდან მოქმედი ეს შეთანხმება კვლავ მყიფეა, რადგან ისრაელი და „ჰამასი“ თითქმის ყოველდღიურად ადანაშაულებენ ერთმანეთს პირობების დარღვევაში.